Bitim VT3.2 billien hemi mani we Kaonsel blong Minista i endosem tete moning tuwods Nasonal Rispons Plan blong Tropikol Saeklon Lola.
Minista blong Faenans mo semtaem Akting Minista blong Klaemet Jens, Hon. John Salong, i anaonsem tete aftenun.
Hemi folem nomo disisen blong Nasonal Disasta Komiti wetem plan blong ol 11 klasta anda long Nasonal Emejensi Operesen Senta we oli sabmitim blong nasonal ripons.
“Mi wanten mekem i kilia long pablik se Kaonsel blong ol Minista hemi bin approvum rekomendesen we Nasonal Disasta Komiti hemi mekem blong shipment blong ol kakae wetem ol narafala saplae i mas go hariap long most impacted eria insaed prioriti eria 1 mo prioriti eria 2,” Hon. Salong i talem.
“Saplae blong ol dry rations o kakae ia bae i kamaot long Port Vila wetem Luganville long Santo.
“Nasonal Emejensi Operesen Senta hemi kodinetem ol relie saplae ia mo hemi monitor blong fulumap ol gaps we i stap.”
Hon. Salong i talem se so far bitim 500 haushold i kasem rispons olsem tapolen, tru long kwik rispons we Nasonal Disasta Manejmen Ofis (NDMO) i kodinetem wetem help blong ol gavman patna mo non-gavman organisasen.
Mo hemi askem pipol blong wok tugeta wetem emejensi operesen senta blong meksua se ino gat i stap bihaen.
NDMO i ripot se i gat 59,662 pipol we oli stap long prioriti eria 1, 16,546 we oli stap long prioriti eria 2, mo 15,053 we oli stap long prioriti eria 3.
