Minista blong Klaemet jens mo Natural Disasta, Hon. Ralph Regenvanu i kam long Mandae blong saenem neks oda blong emejensi rispons long ol afekted aelan blong Tropikol Saeklon Lola.
Emi order 203 we i kam anda long Disasta Risk Manejmen akt, mo i go long ol ministri mo gavman ajensi we i risponsibol long emejensi rispons ya.
“Fes oda hemi golo Ministri blong Faenans mo Ekonomic Manejmen and ol gavman agencies we bai oli consent (wok wetem Faenans) wetem oda ya,” Hon. Regenvanu i talem.
“Evri kontrak we bai yumi pem kakai blo mekem rilif lehem, wetem ol narafala non-food items we bai yumi mekem rilif items, bambae i no moa pas lo Central Tendered Board Process.
“Sapos igat ol gavman kontrak we value blo olgeta emi less than 10 milien Vatu, bambai direkta blo NDMO (Nasonal Disasta Manejmen Ofis) nomo wetem direkta general blong Ministri blong Klaemet Jens tufala i save apruvum ol kontrak ya.
“Emia blo mekem se i hariap.”
Hemi talem se eni kontrak we i bitim amount blong VT10 milien, bai Nasonal Disasta Komiti nomo i apruvum.
Hon. Regenvanu i odarem tu blong ol helt senta mo skul i mas stat blong go long repair.
“Ministri blong Helt wetem Ministri blong Edukesen mo Trening i mas wok klosap wetem Ministri blong Pablik Woks blo fixim bak ol damej helt sentas mo skuls.
“Blo mekem ol kwik repea lo ol samting we yu save mekem blo yumi save usum bakeken ol helt sentas, ol aid post mo hospitals mo skuls,” hemi talem.
Hemi talem tu se ministri ya i mas mekem ol aweanes blong pipol i meksua blong kakai olgeta dry rason (rice, tin tuna, kraka) wetem aelan kakai blong stap long gud helt long taem naoia.
Minista i odarem Faenans Ministri blong kliarem ol kaon blong saeklon rispons blong TC Judy mo Kevin we gavman ino bin pem.
“Igat sam kaon lo purchase blong kakai long Au Bon Marche. Mi andastan se i gat sam kaon long sam ship, we oli bin transpotem kakai,” Hon. Regenvanu i talem.
“Hemi fasin blong gavman nomo blo hemi slo blo pemaot ol samting, mo tu from yumi bin exhaustem budget (usum ap mani) blo emejensi blo tufala saeklon ya, mo naia yumi kam lo narafala saeklon be yumi fesen problem blong faenem mani.
“Yumi gat mani ya, yumi karem finis be naia yumi mas pemaot ol kaon we i stap finis folem proses blo gavman emi slo.”
Instrumen ya emi odarem tu Price Control Unit anda long Ministri blong Faenans blong kontrolem praes blong ship, fret blong kako mo ol jata trip.
Hon. Regenvanu i odarem Ministri blong Pablik Woks, Aviation mo Airports Vanuatu blong givim namba blong ranwei blong ol eapot mo namba blong ol plen blong ol eapot ranwei we i gat kolta.
