Ministri blong Helt hemi rilisim long yestete seven pipol we oli bin stap long kwarentin.
Hemi olgeta we oli repatriate i kam bak long Solomon Islands.
COVID-19 Spokspesen, Len Tarivonda, i talem se everi wan long olgeta oli no soem eni saen blong sik long taem we oli stap long 14 dei kwarentin blong olgeta.
Hemi talem se olgeta ia oli bin repatriate i kam long 27 May mo 14 dei kwarentin blong olgeta hemi en long Wednesdei, mo helt i rilisim olgeta yestete moning.
“I kat naoia 186 man mo woman we oli stap yet long kwarentin, olgeta ia oli bin repatriatem olketa long New Zealand mo Philippines,” Mr Tarivonda i talem.
Spokespesen blong COVID-19 ia, i talem se everi wan we oli stap long kwarentin oli go tru long helt jek everi dei.
Mo long nara storian, i kat ova 270 pipol yet i stap blong karem bak olgeta i kam long kaontri folem fes repatriation we bai i en long manis ia June, hemi fokas plante nao long ol stranded citizen mo Residen.
Daerekta blong Dipatmen blong Foren Afea, Yvon Basil i talem se i gat 149 citizen blong Vanuatu long Australia, long Fiji i kat araon 60 mo long New Caledonia i kat 61 pipol.
Daerekta Basil hemi talem se long Australia, kavman hemi stap negosiet naioa wetem ol airline abaot ol kos, mo bai oli repatriate tru long Pacific Humanitarian Pathway.
Mr Basil i talem se wan rod we ol pacific kaontri oli save yusum blong save muvum aot quik taem ol citizen blong hem.
“Long Fiji hemi stap long semak proses,” hemi talem.
“New Caledonia bai negosieisen hemi go hed wetem ol local kavman blong olgeta folem klos releisensip we oli kat wetem Vanuatu, mo oli akri blong help wetem some fand mo negosieisen i go hed blong wan flaet we hemi sud hapen long wiken ia.”
Daerekta Yvon Basil hemi konfemem long VBTC se i kat ol stranded Ni-Vanuatu tu long Europe, US, Taiwan, China mo sam nara kaontri.
“Advaes i go long olgeta pipol konsen blong faenem wan koneksen flaet i go long Australia sapos oli wantem kambak, be long taem naoia ol citizen mo residen ia oli orait nomo,” hemi talem.
“Mo long saet blong olgeta seasonal wokman long Australia mo New Zealand, oli stap long seken plan blong repatriation we bai hemi stat long manis August.”
