Famili blong Ni-Vanuatu Seasonal Wokman long Tanna i wari long insiden we i kosem laef blong wan olfala man long Innisfail, Australia i no longtaem.
Long wik ia, VBTC Nius i toktok wetem ol famili blong John Yalu long Lonapkalangi vilij, West Tanna mo oli talem se hemi wan sapraes nius.
Woman blong hem, Joy John, i kleim se Yalu hemi no wan man blong drink mo hemi wok had blong fidim famili.
“Daddy blong mifala i no drink kava mo alcohol; Mo mifala i stap ko long jej mbe hemi ko long Australia ia i mekem problem ia, mifala i sek mo sori bigwan long hem,” Mrs John i krae mo talem.
“I had nao, i had blong mifala i kasem hem blong toktok. ”
Hevi heart blong sori i no jas stap long woman blong John Yalu nomo mbe bikfala brata blong hem, Willie Yalu, i talem se oli nosave bilivim nius ia.
“Wan fren long Australia i bin talem long mifala, oli bin ring i kam mo talem se brata blong mi i bin kilim wan man mbe mifala i no kasem stret nius,” Mr Yalu i talem.
“Mifala i kasem nius nomo se brata blong mi i bin sperem wan man long knife. Afta mifala i stap folem ap nius ia mbe i jes kam klia se i olsem we i stap. Nao mifala famili we i stap, mifala i neva filim wan samting we i hapen long mifala olsem, mifala i harem nogud mo stap long haos nomo from aksen we brata i bin mekem.”
Hemi namba tri yia blong John Yalu blong ko wok long Seasonal Workers Program long Australia ia blong tekem smol vatu blong helpem smol famili blong hem mo vinisim gud cement haus blong famile, mbe long Sandei February 20 2022, sori nius i kassem olketa se papa blong fo pikinini ia i kilim i ded wan man.
Woman blong Willie Yalu tu, Meriana Yalu i talem se papa blong olgeta fo pikinini ia i sapotem bigwan famili.
“Sista blong mi ia hemi jes bonem wan moa bebe mo hemi no mekem garen,”Mrs Yalu i talem.
“Mo dadi blong ol pikinini ia nomo i stap wok long Australia mo helpem olgeta.”
Las taem we woman blong seasonal wokman John Yalu i harem vois blong hem hemi long Thursday February 17 blong talem long hem se mani hemi sendem finis mo hemi tekem aut long Friday 18.
Vanuatu High Commissioner long Australia, Samson Vilvil Fare, i bin flae aot long Canberra long wik ia blong ko holem wan miting wetem ol seasonal wokman long Innisfail, Not Queensland folem shock nius se fren blong olgeta i bin jaj wetem murder o kil.
Mr Fare i adresem araon 300 Ni-Vanuatu wokman long Innifail.
VBTC News i andastanem se hemi talem long ol seasonal wokman ia blong stap kwaet mo kontinu blong wok folem ol kontrak long ol farm.
Hemi talem se nomata long murder jaj ia, Vanuatu i kat wan gud long frensip wetem Australia mo Mr Yalu i save karem diplomatic asistens long Ofis blong Vanuatu High Commissioner.
Daily Mail Online i ripotem se olfala man Australia ia i bin askem ol lokol fisherman blong katem aot leg blong hem we i stap soa sam panis i pas bifo hemi ded long Satete las wik afta we hemi alej blong konvinsim Mr Yalu blong katemaot wetem wan circular saw.
Kalman Tal, we i kat 66 yia, i retire wetem sam health problem mo liv long Innifail blong sam yia bifo hemi ded.
Wan famili blong hem, we i no wantem talemaot nem blong hem, i talem se ol famili i wantem privacy long ded ia.
Man ia i talem se Mr Tal i bin sik bigwan mbe hemi deneyem se hemi wan nara sik mo i no sik suga.
Daily Mail Australia i kasem infomesen se Mr Tal i bin stap askem ol lokol fisherman raon long Innisfail ova long las faev mo six manis sapos oli save help blong katem aot leg blong hem we i stap so.
Long Friday naet, we insiden i hapen long Satete moning, Mr Yalu i bin visitim Nite Rumours bar long wan long ol street blong Innifail mo i kat alekesen se hemi folem Mr Tal i ko long Riverfront Fitzgerald park.
Araon long 3;48am, tu brata i bin ko walkbaot long park ia mo faenem bodi blong Mr Tal long wan pul blong blood kolosap long wan sto.
Kasem tete ol famili blong John Ialu long Lonapkalangis, West Tanna i nosave yet se wanem taim stret, bae oli save kat janis blong toktok long loia o John Yalu bageken.
Mr Yalu i stap long haos prison naoia mo wet blong pas long Kot long June 6.
