Department blong Environment i kol long ol otoriti konsen blong taetenem ap moa ol domestic travel insaed long kaontri.

Bio-safety mo invasive species ofisa long dipatmen blong environment, Mimosa, i talem se wei ia nomo i save help blong stopem spread blong ol species we oli save kosem damej long environmen long wan eria.

Hemi talem se faea anis we i stap long ol provins blong Torba, Sanma mo Shefa i spread i ko long aelan blong Malekula mo Ambae.

“ Long kes blong Malekula, storian we i stap se long yia 2015, wan olfala man blong Banks i bin travel i kam long Malekula blong atendem wan seremoni blong mared mo hemi bin tekem wan yang banana,” Ms Mimosa i talem.

“ Nao hemi wan pratis blong taem wan man i travel i ko long wan nara ples mo hemi tekem wan plant, hemi mas daonem plant blong sam dei bifo hemi travel from olsem anis bae i save kamaot mbe long kes blong olfala man ia hemi no bin mekem olsem.

“ Mo hemia long 2015 vinis mbe mifala i no bin save long hem.”

Ms Mimosa i talem se naoia oli stap mekem wok long Malekula mo long en blong manis blong October bae oli ko mekem sam moa wok long

“ Long Malekula mifala i bin mekem survey long site, mo aplaem tritmen,” hemi talem.

“ Site blong tritmen hemi abaot tu kasem fo hekta olsem.

“ Mifala i bin mekem sam rekomendasen blong kambak jekem eria ia long wan manis taem olsem seken tritmen.”

Department blong Environment bae i mekem fes tritmen long ol faea anis long Ambae.

Ms Mimosa i talem se folem fes kwik respon we team i bin kontaktem long aelan blong Malekula i soem se spred blong fire ans hemi ko daon bigwan mo tim i stap redi blong mekem seken respon bifo en blong yia.