Glen Bule, Vice Presiden blong Vanuatu National Provident Fund, Members Support Scheme students Association i talem se ol studen ia oli finem i had taem ol strict mesa i aplae insaed long kampas.
Hemi talem se “ Nationwide curview long Fiji i mekem plante studen i no save spendem tumas taem long Laucala kampas blong mekem skul wok.
“Ol studen i mas ko bak long hom folem curview we i stat long 10 pm kasem 4 am,” Mr Bule i talem.
“ Ol computa lap mo library i clos earli mo i limitim namba blong ol studen nomo.
“Ol tija i no strict tumas long deitline blong ol course assessment mo oli wok kolosap wetem ol studen we oli faenem i had blong vinisim cos.
Ol studen blong Vanuatu long Fiji i talem se i kat plante restriction long ol eria we oli usum blong kasem information long hem.
Mr Bule i talem se bigfala jalenj se plante studen oli use blong stap wek ap leit mo stap mekem ol skul wok insaed long kampas kasem long 12 midnaet o kasem morning.
Wan Postgraduate Studen i talem se ol studen oli statem fins mid-yia break blong olgeta blong statem wan narafala semesta we bai stat long namba 3rd August.
University blong South Pacific i konfemem vinis se seken semesta bai skul i kobak normol, mbe afta long sam niu kes blong COVID-19 long Fiji, university i stap monitarem situasen mo hemi no informem ol studen yet.
Ol studen i hop blong ko bak lo seken semesta sapos situasen i ko bak nomol o kontinu wetem online studi sapos COVID-19 pandemic i kam wos.
Mr Bule i talem se, “Nomata long jalenj ia mbe University blong South Pacific long Fiji i kat gudfala management strategy i stap inples we hemi efektive mo i helpem ol studen bigwan blong completem ol cos blo olgeta long semesta ia.
