Campaign for Justice (C4J) i talem se hem i no hapi long fasin we Kavman hem i authorizem Blue Mirror Limited wan kampani blong representem hem olsem authorize ofis blong dil wetem permanent residence mo citizensip program.
Senior Investigator long Campaign for Justice, Willie Alick Pakoa, i talem se disisen blong Kavman blong authorizem Blue Mirror blong dil wetem permanen residence hemi no stret from i gat sam alekesen we i stap akensem kampani ia.
Hem i talem se long wan investigation we C4J i mekem long 2019, i faenemaot se kampani ia, Blue Mirror Limited i bin rijista fastaem olsem wan ril estate be i no olsem agent blong mekem bisnis wetem sale blong Vanuatu citizenship mo passport.
“Risen we mifala i karemaot investikesen ia i ko long Blue Mirror Limited hem i pat mo pasel blong investikesen blong paspot from plante moa Chinese we oli stap kamaot long mein lan China oli ol klaen blong Blue Mirror,” Mr Pakoa i talem.
Hem i talem se investikesen ia i faenem se Blue Mirror Limited i bin rijista olsem wan kampani anda long tufala daerekta we tufala i ol lokol blong Eratap vilej long Efate.
Mr Pakoa i talem se wan long ol daerekta ia i bin asosiet wetem wan Chinese woman olsem asisten blong hem blong manejem Blue Mirror Limited.
Hem i talem se Chinese woman ia hem i wife blong Feng Peng ona blong Feng Peng Fei kampani mo Vila Times newspaper.
“Taem we mifala i dig moa i ko insaed, mifala i ko faenemaot se rili Blue Mirror hem i rejista anda long nem blong Samuel Andrew, tufala daerekta,” Mr Pakoa i talem.
“Taem we mifala investiketem se hu ia olgeta Chinese ia, mifala i faenemaot se sam long olgeta Chinese ia oli gat bakgraon blong olgeta we i kwestenem enkejmen blong olgeta wetem Blue Mirror mo isiu blong sale blong paspot.”
Mbe Deputy Prime Minister mo Minister blong Internal Affairs, Alatoi Ishmael Kalsakau, i talem se Kavman i andastanem konsen we i kamaot long Campaign for Justice.
Minister Kalsakau i talem se bifo hem i isium eni agrimen blong citizenship mo permanent residence program bae pesen we i stap aplae from i mas ko tru long investikesen we ol ofisa blong hem, Immigration Department mo Financial Intelligence Unit bae oli karemaot long pesen ia.
“Kavman i no stap mekem wan samting olsem wan pride man, yumi kat wan gudfala system i stap longtaem vinis i kam blong jekem gud. I kat national loa i requirem mo yumi bin pasem plante loa I ko long Palamen mo infact yumi mas kat gudfala jek wetem ol pipol we oli mekem bisnis wetem yumi,” Minister Kalsakau i talem.
VBTC i bin kasem ofis blong Blue Mirror blong karem respon, be kasem naoia Blue Mirror Limited i no aveilebol blong respon.
Mbe, Department blong Immigration i talem se i no Blue Mirror Limited nomo we Kavman i authorizem hem, i gat nara eight kampani we oli karem authorization blong dil wetem program.
Department i talem se, long kes blong Blue Mirror Limited, Immigration tim i bin mekem investikesen long ol alekesen we i stap agensem kampani ia be oli no faenem pruv long olgeta alekesen we pipol i stap mekem agensem kampani ia.
