Yvon Basil i talem se oli stap wok wetem Air Vanuatu blong lukluk long ol schedule blong ol cargo flaet blong olgeta.

“Mi stap wet long Air Vanuatu blong putumaot schedule blong cargo flaet blong olgeta, mi bin mit wetem olgeta long wik ia mo toktok wetem olgeta mo askem olgeta from oli stap plan blong putum aot wan plan schedule blong olgeta,” Mr Basil i talem.

“Mi askem tu se sapos oli save mekem se New Zealand flaet hemi prioriti long flaet schedule blong olgeta mo sapos oli save putumaot long nekis 10 kasem 24 haoa blong mifala save mekem plan folem.

“Wetem situasen we kaontri i stap long hem naoia, bae COVID-19 rul i stil stap taem oli flaem ded bodi blong leit High Commissioner, Johnson Naviti i kambak long kaontri.”

Mr Basil i talem se bae ol famili mo ol ofisol we bae oli folem body blong hem i kam long New Zealand bae oli mas ko tru long kwarentin.

“Mbe mifala i stap tinktink long ol family, wife, ol pkinini we bae oli kam wetem ded bodi blong hem, bae oli wantem participate long funeral tu so mifala i stap tinktink long sam wei” Mr Basil i talem.

“ Wan wei sapos oli kam wetem ded bodi bae oli mas ko long kwarentin mo wet kasem oli aot long kwarentin blong mekem ded seremoni.

“Nara opsen tu se sapos ol famili i save kam festaem  mo ko tru long kwarentin mo taem oli stap kamaot, bodi blong leit High Commissoner, Mr Naviti bae i jes kam long semak wik mo oli save serem sori.”

Mr Basil i talem se Vanuatu lusum tu citizen blong hem aotsaed long kaontri long wik ia.