Implementation blong creditors’ compromise blong Air Vanuatu bae hemi save gohed afta long wan decision weh Apil Kot hemi putumaot tete afternun.

Decision blong Apil Kot ia hemi dismisim apil blong 5 former pilot, mo wan former director blong Air Vanuatu weh oli stap jalensen creditors’ compromise blong Air Vanuatu weh ol liquidator blong Airline ia oli bin proposem.

Ol former pilot ia weh oli bin lusum wok from liquidation mo former director ia oli bin askem kot blong setem asaed compromise ia or rule blong bae hemi no aplae long olgeta.

Suprim Kot hemi bin rejektem aplikesen blong olgeta mo nao ia Apil Kot bakegen hemi upholdem disisen ia.

Kot hemi eksplenem seh wetem decision ia, hemi minim seh Air Vanuatu (Operations) Ltd (In liquidation) hemi nomo stap long liquidation naoia.

Long decision blong tete afternun, Apil Kot i rule seh 6 fala creditor ia oli no bin save establishim seh igat wan material irregularity long process blong karem approval long compromise ia.

Decision ia i minim tu seh oli no bin save pruvum seh compromise ia hemi no fair mo hemi spolem olgeta.

Folem decision ia bae ol appellants blong case ia bae oli mas pem ol respondents VT 1 million olsem cost blong case ia.