Deputy Director blong Fisheries Dipatmen, Sombert Gereva i talem se aktiviti blong pipol olsem bildim toilet o fanis blong pig kolosap long solwota i kontribut long fish poison.

Long wik ia, National Surveillance Unit long Ministri blong Helt i rikodem 32 pipol oli kasem sik blong fish sins January.

“Ciguatera hemi form blong poison taem man i kakae fish afta hemi sik long hem; hemi hapen folem ol aktiviti blong pipol long graon; exampol pipol i fidim pig kolosap long solwota o bush toilet afta yumi kat ol bigfala plantation taem ren i ren, graon i ko daon long solwota wetem evri doti wota blong toilet o ol animol i ko long solwota.

“Ol fertizer we yumi yusum long graon i ko tu long solwota. Taem ol doti ia i kam plante nao i alaoem ol smol animol nao blong gro mo i enkarejem ol nalumlum i gro. Ol doti ia ol smol fish i kakae mo taem ol bigfala reef fish i kakae olgeta oli kasem fish poison ia.

“Taem yu kasem fish yumi nosave wanem kaen fish i poison be ol reef fish ia nao.

“Saen blong fish poison hemi sitsit wora, traot, man i sikras mo numb, hed i raon, mo bodi i weak mo pipol i save sik tu o tri dei olsem o i save tekem longtaem blong harem gud bakegen.”

Twenty Three fish poison kes long Penama, six long Malampa mo tri long Shefa.

Mr Gereva i talem se majoriti long ol reef blong Vanuatu i ded mo pipol i mas luksave impotens blong lukaotem gud marine laef from hemi sos blong kakae mo vatu.