I kat lukluk se Boeing 737 Aircraft blong Air Vanuatu bae hemi spendem wan moa manis long Australia.
Wan long ol shareholder blong airline, Minister blong Finance, Hon. John Salong hemi talem se aircraft hemi stap go tru long C-Check yet mo bae kat wan posibiliti se bae hemi spendem full April ia bakegen long graon.
Folem ol las ripot blong Air Vanuatu long wan pres rilis, oli talem se Boeing 737 aircraft hemi stap unda long ripea long manis blong February kasem April.
Hemi seken wik blong manis April be e nokat wan saen blong Boeing 737 aircraft yet.
VBTC hemi toktok wetem sam sos long airport wetem informesen se aircraft bae hemi kasem Vanuatu long end blong manis April.
Ol sos long Air Vanuatu oli talem tu se oli harem sam ripot, be ino confirm yet se airline hemi gat wan bigfala kaon long sam private kampani mo long kampani we airline hemi lisim 737 Aircraft long hem.
Long wan social media post, Lida blong Opposition, Hon. Alatoi Ishmael Kalsakau, hemi kwestenem VT2 bilien blong Kavman weta i bin pem aot outstanding o nokat, mo hemi askem from wanem nao Air Nauru i nomo wantem Vanuatu i stap usum ol plane blong olgeta.
VBTC hemi traem blong kasem mein ofis blong Air Vanuatu blong karem sam letes updeit be oli talem se i no posibol.
Wetaem bae hemi flae bakegen, hemi wan kwesten we airline ino gat ansa blong hem yet.
