Proper Zone Planning long ol eria council long ol province hemi save kam wan ansa blong stopem problem blong inkris blong ol namba blong ol eviction oda long ol setelmen espeseli insaed mo araon long Port Vila.
Long Shefa Province, Zoning Control Development Plan hemi wan requirmen insaed long physical planning Act weh Council hemi save lukluk long hem blong stopem isu blong ol eviction order weh oli stap afektem fulap famili.
From high namba blong populesen inside long Port Vila urban eria, fulap familie weh oli muv i kam long Efate blong wok oli lif aotsaed long urban eria weh hemi stap inside long juristriksen blong ol eria kaonsel blong Shefa Province.
Eviction order hemi stap tekem ples long time finis i kam mo bae hemi save go head blong tekem ples sapos pipol oli continue blong stap illegally long ol eria ia weh oli stap anda long Province.
Taem VBTC News hemi askem tingting blong niufala Secretary General blong Shefa Province about isu ia, Lionel Kalwat hemi rifer igo long Zone Planning.
Mr Kalwat hemi givim tingting blong hem tu folem ol fasin weh oli save lid igo long ol eviction order weh i stap afektem fulap families.
Fasin blong kivim eviction order hemi stap kamantap bigwan weh i lukim long las yia nomo igat ova 600 pipol oli mas riloket afta weh ova 100 haus oli destroyed long Korman eria.
Long yia ia, igat samples 300 pipol finis oli karem eviction oda blong mas muvaot long Salili eria before namba 2 December.
Igat wan mo eviction order too weh hemi effective i stap naoia long wan lease long Eratap eria weh ova 700 pipol oli mas muvaot bifo namba 24 long manis ia.
