Vanuatu Laborotory hemi okanisem wan ‘Yut Pawa’ projek long yia ia wetem ol yut wetem sapot blong Yut Jalenj Vanuatu mo Mele Marama Yut Fondesen.

V-LAB emi kat 500 yut memba finis weh oli finisim incubesen trening long hao blong statem wan bisnis sins long taem weh kampani stadem wok long 2019. 

Komunikesen Speselis blong V-LAB, Emma Hivo i talem se pepos blong projek emi blong helpim ol yuts long Efate wetem ol trenings blong bisnis mo hao blong finem wan gudfala wok blong oli save kat wan gudfala futja.

“Yumi blong helpem ol yut blong yumi we oli no finisim skul blong kivim wan opotuniti blong oli save tekem bak laef blong olgeta mo statem wan bisnis o finem wan gudfala wok,” hem i talem.

“I kat plante yangfala we no laki tumas blo finem wan wok, yumi we yumi skul gud mas traem blong helpem olgeta.”

I kat 2 trening ajenda anda long Yut Pawa projek, fes wan emi wetem Marama Yut Fondesen we emi wan 1 dei woksop blong bildim lidasip skil blong 300 yut memba long fulap rurol komuniti olsem Mele, Erakor, Mele Maat, Ifira, Malapoa, Vila Not, Pango mo Seaside.

Nara ajenda emi kat 2 mo trening we V-LAB mo Yut Jalenj emi mekem wetem kolosap 100 yut memba long manis blong July kasem Decemba.

Long tu trening ya i kat ‘Redy blong Bisnis’ trening weh V-LAB emi mekem blong helpem ol yuts blong oli save lanem ol impoten skil blo statem bisnis blong olgeta.

Seken trening emi ‘Redy blong Wok’ we Yut Jalenj emi trenem ol yut memba blong how blo kam wan gudfala wokman mo finem wan gud wok lo kantri.

Nekis manis pa 48 yut memba we tek pat long trening blong Redy blong Wok trening pa oli finisim intensip prokram blong olgeta, mo 50 yut memba tu long Redy blong Bisnis wetem V-LAB pa oli karem setifiket blong endem gud Yut Pawa projek long yia ia.

Yut Pawa projek emi karem mani blem long Komon Welt blong Lening mo Niu Zelan Ministri blong Foren Treds.