Wan yangfala boy long Not East Ambae i stap long serious kondisen long Lolowai Hospital afta we wan Black Palm tri i foldaon antap long hem taem hemi ko long garen long Tuesday.
VBTC Correspondent long Ambae, Gibson Tari i talemaot se boy ia i kat 20 yia.
“Insiden ia i hapen long dei bifo yestete(Tuesday) i luk wan yangfala i bin aot i ko long garen blong tekem sam kakae long garen; Mbe afta hemi nomo kambak, ol parents oli bin wet long hem kasem long Thursday moning oli faenem aot se kakae i stap long kitchen mo doa blong haos blong hem i open i stap; Oli ko jekem hem mbe hemi no stap long ples we hemi sapos blong stap long hem, afta oli tinkbaot se hemi talem se bae hemi ko long garen, taem oli kasem garen; Yangfala ia i bin kasem wan asiden we i luk wan black palm i bin foldaon antap long hem, hemi kilim hem mo samtaem i kat fulap rope i kavemap hem mo hemi nosave muv. Taem Papa blong hem i wokbaot i ko mbe i harem boy ia i stap mekem noise mbe hemi nosave muv, “Mr Tari i talem.
“So parents blong hem i katem aot ol rope ia mo tekem hem i ko daon from hemi slip antap long wan wood. Afta oli faenem aot se wind blong hem i no stop, hemi stil stap breathe afta oli karem hem long bag i kam long haos. Ale oli traem mekem fes aid mbe i nosave wok. So oli mas wokbaot wan longfala distens, trak i nosave vilij hemia long Not East Ambae so ol yangfala i putum hem long wan bag mo tekem hem long rod we hemi araon 15-20 kilomita i ko daon long coastal eria blong faenem wan trak we i save tekem hem i ko long hospital.
“Boy ia i bin slip ovanaet kasem long Thursday i ko long hospital.
Mr Tari i talem se hemi givim lesseon tu long ol yangfala se disasta hemi wan samting we pipol i mas lisen mo stap kwaet.
“Saeklon woning i kamaot long Meteo blong yumi stap sef; So hemia hemi wan samting we i hapen, mo bae mifala i ko hed blong folem ap situasen blong boy ia we naoia i stap long hand blong ol nurse mo dokta,”Mr Tari i talem.
