Ol wokman blong Kavman i kasem woning blong folem ol COVID-19 rul mo mas tekem stik.
I kat ova 6000 kavman wokman raon long Vanuatu.
Jeaman blong Public Service Commission, Simil Johnson, i talem toktok ia long national TV.
“Long saed blong Public Health Oda we Minista blong Health i bin mekem mandatory vaccination(wan mas blong tekem stik), sam ministry mo dipatmen blong kavman i bin ripon long code blong Public Service blong provaedem ol vaccination status ,” Mr Johnson i talem .
“Mo yufala we i no provaedem yet ol infomesen i kam long Public Service, mi stap askem strong blong yufala i folem mo givim infomesen. ”
Vanuatu i stap long 14 dei curfew mo Mr Johnson i askem ol wokman blong hem blong stap long haos mo wok blong ol esential seves i ko hed.
“Mi askem evri wan blong kontinu akseptem ol jalenj,” Mr Johnson i talem.
“Ol dipatmen i nid blong aktivetem ol bisnis plan blong ko hed. Mo olgeta we oli nidim help, oli nid blong askem long Ofis blong Government Chief Information Officer(OGCIO) blong setem ap olgeta. Yumi kontinu blong nomo alaoem ol miting long ofis mbe online nomo blong ol rul blong COVID oli kipim anda long Public Health Emergency Oda.
Public Service i kol long rispek long ol rul blong COVID.
“Mi askem yumi evri wan ol civil servant blong mekem komitmen blong adresem ol isu we i releit long Public Emergency oda.” Mr Johnson i talem.
“Yufala i tinkbaot ol famili blong yumi mo kontinu blong pratisim gud health. Afta long wok, i kat ol eria we yufala i mas mekem bifo yufala i kobak long aos.”
