Sunday, April 14, 2024
24.8 C
Port-Vila
Sunday, April 14, 2024
More

    Wan yangfala i tekem aot laef-Efate

    Polis long Port Vila i atendem wan suicide long eria blong Teouma Aid Post, Efate long wiken.

    Araon mid-dei, wan 18 yia old gel hemi tekem own laef blong hem insaed long haos blong olgeta afta long wan rao wetem papa blong hem.

    Long moning blong semak dei, yangfala gel ia hemi talem se mbai hemi ko luk wan fren blong hem blong karem wan smol mani.

    “Hemi talem se mama yu stap mbai mi ko karem wan mani blong hospital blong yu,” mama blong gel i talem.

    Taem gel hemi kambak, papa blong hem i talem long hem blong oli somapem natangura.

    “Hemi talem se hemi taet mo hemi wantem ko silip smol,” Mama i talem.

    Polis ripot i talem se smol toktok i kerap, mo papa blong gel i sarem hem insaed long haos mo i nilim doa.

    Hemi wonem ol narafala pikinini blong hem blong oli nomas openem doa.

    Mama blong gel ia, eye blong hem hemi no wok gud (blind) mo emi paralyze long leg.

    Hemi rimemberem gel blong hem olsem raet hand blong hem mo helpa blong em raon long haos.

    “Wan hapi gel, Mbeh emi no wan gel we emi stap toktok,” mama i talem.

    “Hem nao emi main man we i servem mama long haos.”

    Hemi talem se famili i no tingse mbai insiden ia mbai i kamaot olsem, from papa i mekem olsem wan discipline long gel.

    “Long taem blong inciden ia, mifala i stap kuk aotsaed,” Mama i rikol.

    Mama i kontinu se afta long kuk, hem i ko insaed long haos mo talem long papa blong gel blong i openem doa.

    “Mi go sitdaon mo tok long dadi blong olgeta se plis yu ko openem doa afta karem aot hem,” Mama i talemaot.

    “Tufala smol wan nao i ko openem doa mbeh tufala luk emi difren.

    “Brata blong hem mo dadi – tufala nao i ko karemaot hem mo putum hem i kam aotsaed.”

    Long Wednesday wiki a, autopsy ripot i talemaot se gel Tongoa ia hemi ded folem suicide, polis i ripotem.

    Mama i rikolem ol gudfala memori blong gel.

    “Gel hemi bon long namba 7 July 2005 – yia ia mbai emi kat 18 yia,” Mama i talem.

    “Hemi talem long mi se mbai hemi somapem natangura mo salem blong mekem mani blong pem wan cake long birthday blong hem.

    “Hemi talem se, mama, mbai namba 7 July yumitu kakai cake blong birthday blong mi.

    “I no namba 7 July iet mbeh hemi ko finis,” Mama i serem.

    Wan fren blong gel we i ded (we inowantem se nem blong hem i kamaot), i talemaot se gel ia hemi no wan gel we i stap hang araon tumas wetem ol yangfala.

    “Hemi kam mifala story mo laflaf, mbeh bigfala taem nao emi spendem wetem mama blong hem,” fren ia i talem.

    “Hemi smart tumas blong wok lo garen; hemi helpem mi bigwan tumas. Mbai mi luk spes blong hem.”

    VBTC Nius i kasem ripot se long semak dei blong insiden, Polis i arestem papa blong gel.

    Hemi kasem charge blong False Imprisonment we i stap long section 118 blong Penal code CAP 135 mo Domestic Violence we i stap long section 4(1)(g) mo 10(1) blong Family Protection Act.

    Long section 118 blong Penal code CAP 135, Lawful Imprisonment i karem penalti blong 10 yia.

    Long Family Protection Act, Domestic Violence section 4(1)(g) mo 10 (1) i karem penalty blong less long 5 yia imprisonment, or faen we i no bitim VT100,000 o tugeta.

    Papa blong gel i stap long Correctional Senta naoia afta we kot i grantem remand blong hem long namba 29 Januari 2023.

    Mbai hemi pas long Magistrate Court long namba 10 February 2023.

    By Agnes Herbert.

     

     

    Letest

    Sport

    More article

    • https://radio.vbtc.vu/radiovanuatu
    • Radio Vanuatu
    • Ol Radio Stesen
    • https://radio.vbtc.vu/paradisefm
    • Paradise FM
    • Ol Radio Stesen
    • https://radio.vbtc.vu/femmefm
    • Femme Pawa
    • Ol Radio Stesen