Vanuatu i konfemem wan moa aktiv COVID-19 kes long boda.
Prime Minista, Honoroble Bob Loughman i mekem anaonsmen ia long Sunday.
Prime Minista Loughman i talem se wan moa franlaen wokman i tes positiv long COVID-19.
“Long moning ia mi kam blong anaonsem se yumi kat wan totol blong 12 COVID-19 aktiv kes evriwan long Vanuatu, mo evri oli ol boda kwarentin kes,” Prime Minista Loughman i talem.
“Ministry blong Health i faenem vinis ol nara klos kondak blong olgeta we oli stap vinis long kwarentin folem strict protocol we i stap.
Folem ol kes investikesen ia mo risk asesmen we surveillance tim blong ministri blong helt i mekem, hemi konfemem se i nogat eni komuniti transmisen mo tu hemi help bigwan blong kivim wan klia andastanding long situesen we hemi i stap.
“Folem ol advaes blong ministry blong health wetem ol mesa we i stap, Health Emergency Advisory Committee i disaed se stat long yesterday February 26 2022 long 6 o’klok long aftanun yumi apliftim ol domestik pasenja travel long air mo sea aot long Efate.
Temporari ristriksen blong ol international inbound flaet long solwota mo air i stap yet. International outbound travel long solwota mo air hemi kontinu, hemia emi inkludum ol cargo we oli ko aot mo kam insaed long kaontri mo ol medivac. Kasem tete i nogat eni komuniti transmisen long Vanuatu.”
Prime Minista Loughman i talem se Efate mo ol offshoa aelan blong hem i stil stap long alert 1 mo ol nara aelan i stap long level 0.
“Ol aksen blong mekem long alert level 1 hemi blong folem gud ol health mesa olsem, wasem hand wetem soap mo wota, no tajem eye,nose mo maot, oltaem mas disinfektem ol seves olsem tebol, jea mo ol nara seves. Taem u cof u praktisim gud hygiene,” Prime Minista Loughman i talem.
“Mi apil bageken long olgeta we oli no kasem COVID-19 vaksin yet, plis kol blong kasem vaksinesen blong you. Vaksin ia nao bambae hemi sevem laef blong no sik bigwan, blong yu no silip long hospitol mo blong yu no lusum laef.
Ministry blong Health hemi stap rolem aot vinis, ol boosta dos folem ol type blong COVID-19 variant we i stap afektem ol famili blong yumi long pasifik, hemi gud blong yumi priperem yumi blong kasem boosta dos blong priventem risk.”
Prime Minista Loughman i enkarejem pablik blong karem stret infomesen long stret sos we hemi Ministry blong Health.
“Plis ko visitim Health COVID website, Health Promotion fesbuk pej o kolem 119 blong karem moa infomesen abaot COVID-19.
“Mi stap wantem aknowledgem mo aprisietem bigfala wok we ol franlaen agensi blong yumi oli stap mekem blong protektem komuniti blong yumi long COVID-19.”
“Tankiu tumas mo God bambae i blesem yumi evriwan.”
