Search i stap ko hed from wan man Erromango we i lus long solwota yet .
Legal ofisa long Office blong Maritime Regulator, Lloyd Fikiasi, i talem se Tom Nauwia, i bin travel long wan seven mita banana bot wetem 80 lita blong fuel mo sam lokol kakae mo hemi neva kam bak long aelan kasem naoia, afta las wik we hemi bin lus long solwota.
Hemi talem se Maritime Regulator mo National Disaster Management Office i kontaktem aerial search long eli wik ia mbe oli no luk eni saen blong man ia.
“Mifala i mekem search long Monday mo Tuesday mbe i nokat eni saen nomo, “ Mr Fikiasi i talem.
“Nawia long level blong vili, ol lokol i talem se search bae kontinu kasem fridei mbe long Kavman saet, ol authoriti yumi nosave se pa yumi mekem wan moa search o nokat from hemi had blong diployem wan search long solwota from yumi no tekem wan kodinet.
“Mbe long tufala eria we yumi bin mekem search long hem ia, yumi no faenem eni samting nomo.”
Mr Fikiasi i talem se long Port Narvin long Erromango, port ia nao Mr Nauwia i stap lem afta hemi sail i ko long North mo infomesen we mifala i kasem long ol lokol se, hem wan nomo insaed long bot.
Hemi talem se ripot we oli karem long ol lokol se, Tom Nauwia i minim blong ko long trip ia from nomoli hemi ko huk plante taem mo hemi save spendem wan naet long solwota afta hemi mas go bak soa mbe long wokbaot blong hem ia, hemi no ko bak luk ol famli i mekem se ol pipol i stap lukaotem hem.
“Infomesen we mifala i kasem se hemi no blong huk mbe hemi plan blong ko long Efate mo pat long Independence selebresen mo hemia nao hemi bin tekem wan bigfala amaon blong fuel,” Mr Fikiasi i talem.
“Mbe dadi blong hem i bin stopem hem from i nokat ship blong ko mo hemi bin eim blong kam kros long ship Tauraken III long 31 July.
“Tauraken hemi aot long Tanna long morning blong 31 July blong kam long Efate.”
Mr Fikiasi i talem se long steij ia oli nosave se hemi usum wanem long saed blong navigation mo nosave gud sefti blong bot.
Ofis blong Maritime Regulator i remaedem ol smol bot operator blong folem oltaem ol rul blong sefti olsem oli no sail long taem blong rabis weta, mas jekem enjen blong bot bifo oli sail mo mas mekem sua se ol basic safeti tool i stap long bot olsem laef jaket, mirror, mobile phone mo torch mo wan man i neva ko long solwota hem wan.
Age blong Tom Nawia hemi raon long 20 kasem 30 yia.
