Grup blong vot NO awenes oli bilif se tufala amendmen blong 17A mo 17B we pipol bae vot lem long Nasonal Referendum hemi anti-constitutional o agensem mama loa blong kauntri.
Jeaman blong grup blo vot NO, foma Memba blong Palamen, Joshua Tafura Kalsakau hemi talem se yumi nosave kivim limit, restriction mo boundary long japta 2 long atikol 5 we hemi Fundamental Raet.
“Ol olfala blong yumi oli stanap long foundation blong Konstitusen ia, hemia nao yumi stap traem blong defendem,” hemi talem.
Mr Kalsakau hemi talem se Kavman hemi stap ko raon wetem VT350 milien blong mekem ‘scam’ blong amendem tufala amendmen ia i ko insaed long Konstitusen.
“Hao nao yu tritim Demokrasi long naked eye blong ol pipol? Hemi unfortunate, hemi sad mo hemi wan mokeri long ol pipol.”
Hemi sakem kwesten tu se from wanem nao ol MP oli jenjem politikol pati we oli no kampen insaed lem mo oli no win tru long platfom mo polisi blem.
“Sapos hemi hapen olsem, i minim se long taem blong kampen blong yu, yu wan yu createm scam long ol pipol.”
Mr Kalsakau hemi talem se wokbaot mo awenes blong vot YES blong Referendum hemi usum rong ideology mo rong concept.
“Oli prijim lanwis blong instability, yu kam prijim instability, wetaem pipol i kosem instability?” hemi askem.
“Instability hemi problem blong aos, i minse aos i kat problem blong brain.
“Hemi wantem karem problem blong aos i kam long pipol, pipol oli no kosem instability.”
Hemi tok moa se oli mas kivim time long ol pipol blong andastan tugeta saed blong vot NO mo YES bifo oli vot long Referendum.
“Yu kivim time from ol pipol blong Vanuatu oli ol custodian long Konstitusen ia.”
Mr Kalsakau hemi talem moa se Kavman hemi spendem VT350 milien be awenes grup blong vot NO oli stat wetem zero vatu.
Fulap memba blong pablik oli lisen wetem interes taem tim blong grup NO oli lonsem awenes kampen blong olgeta las wik long Fraedei namba 12 long Feiawa park, seafront.
Mr Kalsakau hemi talem se wetem turnaot blong awenes ia, olgeta i konfiden long wokbaot blong defeatim Referendum.
“Ol lanwis, ol mesej, ol toktok mo ol tingting blong grup NO ol pipol oli capturem,” hemi talem.
Wetem ofisal lonsing ia, Mr Kalsakau i talem se wetem tim we hemi lidim bambae oli traem evri best blong mekem kampen awenes ia long full Efate, Malekula mo Tanna sapos time i alaowem.
