Ol emploia mo emploie bae oli faenem i isi naoia blong wok wetem Vanuatu National Provident Fund tru long wan niu website.
Vanuatu National Provident Fund i lonjem vinis niufala website ia we oli kolem Employer Portal mo Member Kiosk.
General Manager blong Vanuatu National Provident Fund, Parmod Achary, i talem se hem i wan website we ol emploia oli save gat akses blong pem VNPF blong ol wokman blong olgeta mo save luk akaon blong olgeta long hem.
Hem i talem se i kat tu seksen long website ia, wan hem i blong ol emploia blong oli save regista mo yusum blong pem VNPF blong ol wokman blong olgeta long hem mo nara seksen hem i blong ol wokman oli save jekem ol akaon blong olgeta.
Mr Achary i talem se risen blong mekem niu divelopmen ia hem i blong helpem ol emploia mo emploie blong oli save sevem taem mo mani blong olgeta mo no had wok blong stap kam long VNPF ofis.
Mr Achary i talemaot sam use blong website ia “Emploie bae hem i save luk akaon blong hem, sapos oli bin pem o nogat. Ol emploia bae oli save registarem ol emploie blong olgeta olsem wan memba witaot intaferens blong VNPF, uploadem kontribusen skejul online.”
“Lukim everi aktif wokman long dipatmen blong olgeta. Lukim ol peimen we oli pem vinis mo save luk ol aotstanding.
Hem ia bae i help wetem taem mo mani blong oli nosave stap ko everi taem long VNPF ofis,” Mr Achary i talem.
Mr Achary i talem se pipol oli save regista eni taem blong save login long seksen ia insaet long website.
“Everi emploia oli save mekem registration online, oli save jekem everi kontribusen online. Mo oli save jekem tu weta mani we oli bin dipositim long bank hem i klia.”
Mr Achary i bin mit wetem ol emploie mo ol emploia long las wik mo tokabaot niufala divelopmen ia mo olsem wanem blong oli save yusum.
