Pipol i save kasem fes klas medikol tritmen long kaontri tru long wan niufala medikol insurens prokram we Vanuatu National Provident Fund (VNPF) bae mekem.

VNPF hemi patna wetem Ministri blong Helt (MOH) blong setem up fesfala medikol insurance long kaontri mo prokram sud stat long manis blong Mei long yia ia.

Acting Direkta Jenerol blong MOH, Dr Posikai Samuel Tapo, hemi talem se VNPF bae hemi usum tufala bilding behaen long Vila Central Hospital mo bae oli mekem olsem wan praevet hospital blo providem ol fes klas helt seves. 

“Ol sam equipment, bajet blo gavman i no able blong sapotem ol famili mo patient we yumi referem,” hemi talem. 

“VNPF i kam in from VNPF i playem wan insurens type of sapot we taem wan famili o wan man o wan patient we i nidim asistens, hemi referem hem tru lo proces blo VNPF insurens, insurens nao bae sapotem patient.”

Minista blong Helt, Hon. John Still Tari Qetu hemi talem se medikol insurance prokram ya hemi wan prioriti blong kavman.

Mo bae prokram ya ishud stat afta long fesfala palimen siting long Februari.  

“Ministri blo Helt hemi neva stap bajet we lo ol referal or nara big isue blo helt. Be Gavman hemi wantem se adresem blo mekem se kontribusen hemi increase mo blo mekem se eni referal, bae yumi save accomodatem tu hem tru lo medikol insurens,” hemi talem. 

“Medikol insurens tu bae hemi kavermap ol famili blo olgeta we ol memba.”  

Acting Jenerol Maneja blong VNPF, Richard Edwin, hemi talem se ol speselise medikol tritmen we hemi stap long nata kaontri, bae i stap long niufala praevet hospital. 

“Cost blo hem, it’s going to be costly. As you know, some people oli fortunate lo gat ol medikol insurens we i helpem olgeta blong kat akses lo ol seves overseas,” hemi talem.  

Mr Edwin hemi tok moa se VNPF hemi wantem setem ap insurens kampani ia blong ol memba save pem ol diferen pakej blong hemi helpem olgeta blong kavermap kost mo blong aksesem ol fes klas seves insaed long kantri.

Hemi talem se manis blong Februari hemi wan impoten manis from privet hospital bae hemi risivim lisens long Risev Bank, mo lukluk long infastrackta blong private hospital ya. 

Mo bae seves hemi shud stat long manis May.