Vanuatu i inkrisim ol niu visa categori i ko long 15.

Director blong Vanuatu Immigration Services, Jeffrey Markson i mekem anaonsmen ia long wik ia.

Ol visa ia i kat Investment Pathway, Employment Visa pathway, Leasehold owner visa pathway, Bridging visa, Religious Worker visa, Development Support visa, Close family Visa, Social Exchange Visa, Tourism Visa, Retiree Visa, Special Category Visa, Diplomatic Visa, Student Visa, Business Multiple Entry visa and Ni-Vanuatu Decent visa.

Vanuatu i bin kat fo categori blong visa long fastaem; Residential, Visitor, Special Categori mo Business visa.

“Mifala i bin lukluk bak long ol visa long taem blong lokdaon wetem ol stakeholda we yumi kat mo mekem sam jens tru long ol muvmen blong pipol in mo aot long kaontri,” Mr Markson i talem.

“Pepes blong 15 niu visa hemi blong givim wan nara lukluk long wok blong immigration. Long pas yumi bin fokas moa long kontrol blong boda be wetem ol niu visa, wanem nao immigration i save mekem blong dil wetem migration; Wanem nao muvmen blong pipol mo kontribusen blong hem long divelopmen.”

Mr Markson i talem se Investment Pathway Visa hemi ol pipol we oli kam in blong invest long kaontri.

“Yumi save se Vanuatu hemi wan smol kaontri be hemi nidim investmen blong developmen,” Mr Markson i talem.

“Long pas, evriwan we oli kam blong invest long kaontri, oli kam in long visa blong residential be hemi kam olsem foreign investa. Yumi kam blong luksave se yumi nid blong sapotem investmen. So visa ia i stap long fo pat. Fes wan hemi Provisional Visa; Meinli wan man we i kam in blong lukaotem opotuniti blong invest mo yumi givim wan period blong fo manis.  Seken wan hemi Business Investor, taem we man ia i kam i luk ol opotuniti, hemi disaed blong invest mo hemi givim aot ol aplikesen, visa ia hemi blong tri yia.  So tri yia hemi blong alaoem hem blong groem bisnis blong hem.  Investor Permanent Visa hemi direk investor, yumi save se i kat ol bigfala kampani we oli stap outsaed mo oli wantem invest long Vanuatu; Hemia bae nomo nid blong kam lukluk raon so yumi givim olgeta 10 yia. Yumi save se bae hemi kam pem graon mo kat plante propeti.”

Mr Markson i talem se seken visa hemi Employment Pathway blong save wok long shot mo longterm long Vanuatu.

“Naoia yumi stap givim aot residential visa nomo so man i ko karem wok permit i kam vinis, yumi givim wan visa ia lem,” Mr Markson i talem.

“Anda long visa ia yumi kat tu pat; Short term employment visas; Ating wan kampani hemi disaed blong tekem wan technikol persen i kam long kaonti, mo long period blong fo manis hemi save yusum visa ia blong leko persen ia o kipim hem sapos hemi wok.  Sapos hemi wok, hemi save yusum Employment visas blong 1 yia. Be ol criteria blem bae Labour i mas givim wan sapot leta.”

Nara Visa hemi Leasehold owner pathway we hemi stap long tri pat; Residential leasehold owner visa, Agriculture leasehold owner visa mo Commercial leasehold visa.

“Yumi kam blong luksave se i kat plante isu wetem ol foreigner we oli kam pem graon afta oli aot ko stap outsaed long kaontri wael graon hemi stap mo no divelopem mo pipol blong Vanuatu i stap trae had blong faenem graon,” Mr Markson i talem.

“Yumi putum visa blong kontrolem ol foreigners we oli kam pem graon be oli no stap long kaontri. Yumi save se long experience blong yumi evriwan taem yu travel i ko long wan nara kaontri olsem wan visita o turis bae yu neva save pem graon long kaontri ia mo lego i stap mo yu kambak long Vanuatu. So tinktink behaed long visa ia, hemi blong taem yu kam live Vanuatu be hemia nao bae yu kam blong pem graon.

Residential leasehold owner hemi sapos wan foreigner, i kat wan wan graon long Vanuatu mo i stap long wan residential lease, ten bambae visa ia i minim se yu mas live long Vanuatu long graon blong yu.

“Bambae mifala i wok wetem Ministry blong Lands blong mekem sua se sapos wan man i bin kam pem graon ale hemi aot, bambae yumi lukluk long ol wei blong dil wetem ol isu blong foveitim ol land title we sam man i pem nomo i lego i stap mo hem hemi aot espeseli long ol residentiol eria.

“Yumi save population gro long town, pipol i nidim graon, yumi luk plante graon i empty stap, sam long olgeta i ko stap 10 yia aotsaed long kaontri mo taem oli kambak oli save salem graon ia ating long faev o six taem moa long wanem we hemi bin pem. So yumi wantem se taem yumi invaetem ol frens oli kam be oli help developem kaontri.

“Ol kondisen blong ol visa ia bae i stap long ol form taem i kamaot.”

Mr Markson i talem se ol visa ia Ofis blong Attorney General i stap priperem ol regulation oda mo once Minista blong Internal Affairs i saenem bae Vanuatu i save yusum.

Hemi talem se oli karem blessing blong Council blong Minista vinis.