Tuesday, April 16, 2024
26.3 C
Port-Vila
Tuesday, April 16, 2024
More

    VBTC fo dei radiothon ‘Ol jif oli singaot’

    Vanuatu Broadcasting & Television Corporation wetem Malvatumauri Council blong ol Jif mo Ministry blong Justice bae i organisem wan fo dei radiothon ‘Ol Jif oli Singaot’ long en blong February kasem eli March blong help bildim bak haos nakamal blong olgeta jif long Port Vila.

    Long tete moning, apil i kamaot long Minista blong Justice mo Community Services, John Still Tariqetu wetem Presiden blong Malavatumauri Council blong ol Jif, Jif Wemal Tuwo Vanu, Willie Grey Plasua blong pipol i help sapotem radiothon ia.

    Long January 30 hemi bin wan dak history blong Vanuatu we i luk bigfala nakamal blong ol Jif mo pipol blong Vanuatu hemi bin born, Hemi fastaem long history blong kastom mo kalja blong Vanuatu we wan bigfala insiden olsem i hapen.

    Presiden blong Malvatumauri Council blong ol Jif, Jif Wemal Tuwo Vanu, Willie Grey Plasua i sori bigwan long loss blong bigfala pawa haos ia.

    “Nakamal ia hemi ples blong mekem pis long ol pipol blong Vanuatu, hemi ples blong unity, rispek, hemi ples we hemi bin solvem fulap problem blong ol famili mo ol aelan; Hemi ples we i tijim ol pipol blong Vanuatu long respek,” Jif Plasua i talemaot.

    “Long March 4 bae i kat wan bigfala seremoni i hapen long foret blong nakamal ia blong kliarem ol material we oli bon. Mo March 5 we hemi Jifs dei mo i foldaon long Sunday, mi stap apil i ko long jej blong Vanuatu blong kat ol worship blong mekem i spesel blong tinkbaot wok blonh long ol jif blong Vanuatu we oli ko hed holem taet pipol mo meintenem pis.

    “Namba 6 March bae i kat groan breaking, apil long ol jif mo pipol raon long Vanuatu blong kam sapot we bae i stap. Eniwan we i kat heart blong kam sapotem haos ia blong ol pipol blong Vanuatu.”

    Acting Creative Director mo Human Resource blong VBTC, Lilon Bongmatur i anaonsem ol deit blong ‘Ol Jif oli singaot radiothon we bae i stap February 27, 28, March 1 mo 2 antap long eria blong Malvatumauri Council blong ol Jif long Port Vila.

    “Vanuatu Broadcasting & Television Corporation i kat wan wok blong pleim olsem National Broadcaster blong Vanuatu blong ribildim bak nakamal blong olgeta jif tru long koloborasen wetem Malvatumauri Council blong ol Jif mo Ministry blong Justice we Malvatumauri i foldaon long ministry ia,” Ms Bongmatur i talemaot.

    “Moa ditel blong radiothon ia bae i kamaot long ol VBTC Platform blong Radio, Television blong Vanuatu mo fesbuk pej; Apil long ol citizen blong Vanuatu blong kam foret mo sapotem haos blong ol jif we i foldaon i stap.”

    Minista blong Justice, John Tari Tariqetu i askem sapot blong evriwan.

    “Olsem Minista blong Justice mo Community Services, mi stanap tete blong aknolejem Chief Executive Ofisa(CEO) blong VBTC wetem ol staff blong tekem lid long fandrasing ia, yumi bin ko tru long wan sad taem; Presiden blong yumi long Malvatumauri wetem CEO yumi stap long mourning session kasem January 15 mo yumi bin klosem sad taem ia.  Mi stanap tudei blong talemaot se naoia yumi kerap mo stanap mo VBTC bae i lidim yumi long campaign program blong yumi. Mi askem yumi evri citizen wetem ol donor patna blong kam foret mo soem sapot blong yu.”

    VBTC hemi wantem informem olgeta audience blong hem se bambae i gat disturbance long ol normal broadcast blong ol program blong hem long television mo radio. VBTC i askem patience mo sapot blong evriwan long taem ia wetem Malvatumauri national council blong olgeta Chief mo VBTC blong yumi stanap mo wok tugeta blong ribuildem bak bigfala nasara blong ol jif raon long Vanuatu.

    Minista Tariqetu i talem se ministry blong Justice bae i stanap oltaem blong sapotem VBTC long radiothon ia.

    Letest

    Sport

    More article

    • https://radio.vbtc.vu/radiovanuatu
    • Radio Vanuatu
    • Ol Radio Stesen
    • https://radio.vbtc.vu/paradisefm
    • Paradise FM
    • Ol Radio Stesen
    • https://radio.vbtc.vu/femmefm
    • Femme Pawa
    • Ol Radio Stesen