Vasanoc bae hemi putumaut seken edisen blong open dei blong olgeta hemia long wik ia long Erakor vilij.
Wetem wan saksesful fes edisen blong olgeta we i bin tekem ples long Manua skul mo Eton skul long sam manis i pas, i lukim long wik ia bae oli kam bak wetem narafala edisen blong olgeta.
VBTC Sports hemi toktok wetem Franis volentia we hemi wok wetem Vasanoc, Mathiue Champenois, mo hemi talem se hemi wan festifol we olgeta oli mekem blong kivim save long olgeta pipol olgeta difren sports disaplin.
Mr Champenois hemi talem se wetem fes edisen i lukim 12 nasonal federesen mo wetem seken edisen ia bae i kat 8 nasonal federesen we bae oli pat long ivent ia.
“Yumi save se rugbi mo futbol hemi wa popular sports, be i no hemia nomo I kat plante sports mo plante nasoal federesen,” Mr Champenoise i talem.
Vasanoc Franis volentia ia hemi poentemaut se, Kol blong Vasanoc long festifol ia hemi blong openem doa blong ovarem wan gudafala opotuniti blong ol pikinini kasem ol olfala blong oli save wanem nao hemi sports.
Bae Vasanoc festifol blong seken edisen ia bae hemi stat long namba 2 kasem namba 3 blong manis ia Oktoba long Erakor Vilij mo Erakor skul tu blong part long hem.
Vasanoc hemi stap infaitem olgeta pikinini kasem ol olfala long Erakor blong save joinem team we bae oli stap taon long vilij, blong selebretem dei ia tugeta, wetem spirit blong sports.
