Vanuatu Made kap tonamen ol semifinals blong hem i set vinis blong kikim off long wik ia long Port Vila municipal stadium.
Taem Tafea futbol klab bae emi ple fes semifinals akensem Ifira blak birds futbol klab mo long seken Semifinals iCount Yatel futbol klab bae i fesem Erakor golden stars futbol klab.
Emia afta long ol kuata finals mats blong last wiken mo long wik ia long Port vila municipal stadium.
Long las wiken Ifira blak bird fc mo Tafea fc oli winim tufala fes mo seken kuata finals mo long yestede aftenun 30 blong manis ia Oktoba iCount Yatel fc mo Erakor golden stars fc oli winim nabatri mo fo kuata finals blong Vanuatu Made kap tonamen.
Taem i lukim yestede aftenun no mata emi fes dei blong wik be Port Vila stadium emi fulap wetem olgeta sapotas we oli bin kam watjem ol las kuata finals mats blong tonamen.
iCount Yatel futbol klab nao emi fesem niu kama long primia lik United malampa fc stret long 12:30 pm mo mats ia emi 50/50 bitwin tufala klab afta we tufala klab i serem semak point long full 90 minits blong mats long 2-2.
Be olsem protokol blong wan kuata finals mats i mas kat wan wina blong kontinue i go long Semifinals mekem senta refri blong yestede Delphin Joseph emi sendem tufala klab i go long extra times.
Mo long extra taem nao iCount Yatel fc i kam blong addem wan moa point long mats ia mo semtaem kualifae tim i go long semifinals blong Vanuatu Made kap long wik ia taem oli bitim United Malampa fc long 3-2.
Mo last kuata finals mats we i bin tekem ples yestede tu i bin lukim Erakor golden stars fc i pleim Naka futbol klab.
Mats ia emi strong bitwin tufala klab taem naka fc emi olem Erakor golden stars fc long fes af long 0-0.
Be long seken af wetem plante experiens pleias we Erakor golden stars oli kat oli kam blong winim Naka fc long 1-0.
Wetem kualifekesen blong fo fala klabs i go long Semifinals long wik ia i soem klia vinis se long Wednisde wik ia stret long 2:30pm Tafea fc bae emi pleim fes semifinals akensem Ifira blak birds fc.
Mo seken semifinals bae i happen long Tasde wik ia long 2:30pm bitwin iCount Yatel fc vs Erakor golden stars fc.
Wina blong ol semifinals blong wiken ia bae oli kulaifae blong plei Grand finals blong Vanuatu Made kap tonamen long wiken ia long Port Vila municipal stadium.
