Gavman bai hemi putum wan nara effort blong lukoutem gud environmen tru long wanem we oli kolem kontena deposit skim.
Minista blong Klaemet Jenj, Hon Ralph Regenvanu, i talem se bai ol product we pipol i pem long store, bambae oli save salem igo bak long wan kampani we bai hemi setap.
Minista Regenvanu hemi se bai hemia hemi helpem blong kleanem environmen mo semtaem generetem income.
“Wan wei blo mekem se ol plastik botel wota i no end ap long solwota is blong yumi mas karemaot,” hemi talem.
“Hemia nao hemi purpose blo kontena deposit skim.”
Tru lo kontena deposit skim, ol botel blo drink olsem Vanuatu Water botel, tin blo Coca-Cola mo nara soft drink, glass botel blo wine, tin blo beer, Tusker botel, o botel blo jus, ol man i save givem bak hemia mo karem bak sam smol mani.
“Evri single kaen kontena we yu gat drink lo hem, bambae kontena deposit skim hemi kam in blo talem se bae yu chargem wan ekstra VT10 lo price blo hem lo shelf lo store, yu pem bae price blo hem go antap VT10 bitim we hemi stap naoia, be yu save tekem sem botel ia, yu save givem back lo ol koleksen points raon lo Vila wetem ol aelans, yu givem bak yu karem bak VT10,” Minista Regenvanu i talem.
Hemi talem se skim ia bae i sta kam olsem wan samting we i givim bisnis mo wok blo ol man we oli nogat wok.
“Yumi wantem kreatem wan bisnis blo yu kolectem ol botel olsem ia, yu givem bak, yu karemaot, bae i no go lo environmen nao, i no go lo solwota, i no go lo ol groan.
“Yumi karemaot, ale bae gavman i findem wei blo deal wetem hem.”
Sam nara Pasifik kantri i gat kontena deposit skim finis, includem Kiribati, Palau, Tuvalu, Federated States of Micronesia mo Republic of the Marshall Islands.
Long 2020 long Kiribati, i gat 970,000 PET botel we oli bin givem bak lo wan koleksen point tru long kontena deposit skim.
Long Palau long 2020, i gat 4 milien PET botel, 400,000 glass botel, mo 200,000 tin we oli bin givem bak lo wan koleksen point tru lo kontena deposit skim.
