Thursday, June 13, 2024
25.8 C
Port-Vila
Thursday, June 13, 2024
More

    Vanuatu i save stretem isu blong Matthew mo Hunter yet

    Praem Minista Hon Charlot Salwai i talem se Vanuatu hemi kat jans yet blong stretem isu blong Matthew mo Hunter.

    Hemi bin talem long VBTC Nius se bai hemi ko lo France blong tokbaot isu ia sapos hemi kat opportunity.

    Praem Minista Salwai i talem se hemi wan important isu from bai hem impactem tu airspace blong Vanuatu

    “Taem we yumi tokabout boda, hemi part blong process blo independence blo Vanuatu. Blo hemi mas gat klear borda lo land mo solwota.

    “Then semtaem too, yumi save klaimem airspace blong yumi.

    “Airspace blong yumi tu yumi no stap kolektem ol raet o fee lo ol plane we oli stap pas antap.

    “So hemi important yumi mas fixim ol boda ia wetem Fiji mo Niu Caledonia.”

    Matthew mo Hunter aelan hemi stap long dispiut naoia betwin Vanuatu mo France mo ikat wokabaot hemi stap kohed naoia blong stretem isiu ia.

    Vanuatu ikat strong bilif se aelan ia hemi stap insaed long borda blong hem, mbe France tu I talem se aelan ia hemi blong hem.

    Long wan visit blong President blong Franis, Emmanuel Macron, taem ikam long Vanuatu long manis July, hemi bin meetim foma praem minista Ishmael Kalsakau.

    Tufala toktok blong solvem issue ia bifo end blong yia ia.

    Be wetem ol instability long Vanuatu, hemi kosem delay long wan wokbaot we Vanuatu isut kat wan meeting wetem France President long manis Septemba.

    Praem Minista Salwai i se nomata long hemia, hemi no minim se Vanuatu i mestem janis.

    “Ikat janis istap yet. Taem ikat opportuniti umi kohed, hemi hemi so important long Vanuatu ia,” hemi talem.

    “Be tedei umi stap lusum plante mani we yumi sut karem long airspace blong Vanuatu.”

    Taem hemi bin Praem Minista long 11 legislature hemi bin wokbaot from bisnis blong Matthew mo Hunter be folem issue blong Covid-19 hemi delayem sam wokbaot.

    Be Praem Minista Salwai I se hemi no end blong wokbaot blong Vanutau kasem kantri hemi finisim bisnis we i nid blong mekem.

    Letest

    Sport

    More article

    • https://radio.vbtc.vu/radiovanuatu
    • Radio Vanuatu
    • Ol Radio Stesen
    • https://radio.vbtc.vu/paradisefm
    • Paradise FM
    • Ol Radio Stesen
    • https://radio.vbtc.vu/femmefm
    • Femme Pawa
    • Ol Radio Stesen