Luk olsem Vanuatu Immigration i kanselem paspot blong wan forena sort taem nomo afta we hemi grantem sitisensip long hem.
Man ia Daniel Kim, Gavman blong Fiji i akiusim hem se istap mekem sam samting we ino stret mo hemi lidim wan cult grup long Fiji.
Kim, Immigresen Ofisel blong Fiji i holem taet blong i wait long kot long namba 15.
Igat allegesen se autoriti blong South Korea mo Interpol i stap afterem hem.
VBTC News i traem blong kasem confirmation long departmen blong Immigration, mbe ino gat sakses nomata long ol phone kol mo ol email.
Mbe Fiji Village i repotem se Immigration blong Vanuatu i kanselem bagegen paspot blong Mr. Kim afta we hemi bin givim long hem long namba 27 October 2023 we hemi long wan wik nomo.
Hemi putum long kwestion olsem wanem Vanuatu Immigration i grantem wan pasport long wan man we hemi gat isiu wetem law blong wan nara kauntri mo wan Pasifik kauntri i wantem depotem hem.
Loya blong Mr Kim we hemi Rajesh Gordon ise client blong hem ibin aplae from Vanuatu paspot befo mbe ino taem we hemi stap long hand blong Border Control Polis blong Fiji.
Fiji Village hemi repotem se infomesen we istap long paspot blong Mr Kim i soem se paspot bae i expire long 2033.
Hemi repotem se atoriti long Korea i kam blong kanselem tu paspot blong Daniel Kim wetem 6 nara kolik blong hem.
Mo Interpol tu i putum red mark long nem ia long Julae 2018 finis.
Ol sos blong VBTC long Immigration i talem se sapos Immigration i kanselem paspot blong hem, i minim se igat sam infomesen we ibin stap long aplikesen ia oli kiaman.
Fiji tu hemi no wantem givim paspot long hem nomata we hemi bin aplae.
Witaot wan paspot blong eni kauntri bae Mr Kim ino save travel yet mo Kot long Fiji bae hemi mit bagegen long namba 15 blong lukluk long wan apil we loya blong Mr Kim i filem blong jalensem oda blong Fiji Immigration we hemi blong depotem Mr Kim.
