Vanuatu i askem help long ol developmen patna long taem blong COVID.
Australia mo New Zealand i helpem Vanuatu blong faetem COVID tru long ol medikol saplae.
New Zealand High Commissioner, Her Excellency, Nicola Simmonds, i talem se hemi funding mo sam masin blong pulum wind.
“Asistens ia hemi faev airfol masin, hemi givim oxygen sapot long ol sik man,” Ms Simmonds i talem.
“Hemia i ko wetem trening blong save olsem wanem blong yusum masin ia. Mifala i stap kodineit wetem Minsitry blong Health blong faenem aot wanem ol nara samting blong sendem i kam long Vanuatu long wik ia. Bambae New Zealand i stap ko hed blong wok wetem ministry mo ol narafala patna blong givhan long pipol blong Vanuatu
Australia High Commission long Vanuatu i talem se oli bin givim 10,000 vaccine, 13,000 Rapid Antigen test, 60 oxygen concentrators, fes mask, glove, thermometer mo hand sanitazer.
Tru long Australia -Vanuatu Health Patnasip, Australia i givim aot medikol saplae i ko long evri health senta mo dispensary long Vanuatu blong help pripea from COVID.
Director blong Foreign Affairs, Yvon Basil, i konfemem se Australia nao i rispon bigwan long nid.
“Australia i sendem tri dokta we oli kam taem yumi rikodem ol fes kes blong sapotem Curative mo Hospital Services,” Mr Basil i talem.
“Mo tu long saed blong infection prevention and control specialist. Yumi kat tu wan health security advaesa we hemi bin sapotem rispon blong COVID long Australia. Yumi kat sam medikol personal mo naoia yumi stap toktok wetem olgeta tru long Ministry blong Health blong wan moa grup i kam daon blong help.
Mr Basil i talem se China i proposem wan plan we oli kolem China-Pacific Island Countries Disaster Management Corporation Mechanisim.
“Oli askem tinktink blong yumi long plesia mo mifala i stap wok wetem National Disaster Management Ofis,” Mr Basil i talem.
“Taem yumi kliarem hem ia, bae yumi stap toktok wetem China long wanem sapot nao oli save givim naoia. China i bin help bigwan long ol rod projek mo long taem blong Saeklon Harold long 2021.
Mr Basil i talem se taem pandemic i stat long 2019, fes kaontri blong help nao hemi China we i bin flaem wan aircraft i kam wetem ol saplae blong mask mo test kits.
“Long lastaem we Minista blong Foreign Affairs , Mark Athy hemi bin mit wetem ol nara Pacific Island minista blong Foreign Affairs oli bin mit wetem China blong asistim olgeta long Covid,” Mr Basil i talem.
“Folem Miting ia China i bin handem ova VT25 million long cash mo mani i stap long Finance blong olgeta long health i save yusum blong dil wetem COVID.”
Mr Basil i talem se oli stap wok wetem France tu blong sapot.
