Depatmen blong Enviromen hemi kivim wan faen blong VT9 milien long Vanuatu Forestri Indastri Limited from oli nogat wan pemit blong karem aot operesen blo katem daon tri long Santo.
VBTC News Tim long Sanma provins i finemaot se wok blong praevet kampani ia hemi blong katem daon tri long sam graon lo Southeast Santo mo mekem i kam wood chips blong sendem ko long China blong oli prosesem i kam pepa.
Wan ofisa blong Depatmen blong Enviromen long SANMA, Anaclet Philip i talemaot se olgeta ino luk eni permit blong logging long kampani ia.
“E nokat wan application i kam tru long mifala blong talem se bambai mifala mekem assesmen mo mifala kivim wan permit,” hemi talem.
“Ol wokbaot ia ol depatmen oli bin mekem blong kivim kampani from long taem we oli kam establish oli no bin applae blong karem wan permit, process ia oli fail blong mekem.”
Hemi talem moa se oli folem proces blong kivim notis penalti long olgeta las wik we hemi VT9 milien blong kampani ia hemi mas pem.
Ofisa Philip i talem se oli sud luk pemit ia folem stret proces blong wok.
Direkta blong Forestri Depatmen, Rexson Vira i talem se afta long 11 manis we kampani karem raet blong operet, oli bin askem kampani blong stop katem daon ol wood mo pem aot fastaem olgeta we oli katem finis.
Hemi talem se oli agri blong kampani mas pem lan owna folem hamas wood we oli bin katem daon.
“Original tingting hemi blong oli karem “chipa” i kam blong chipem ol wood ia mo sendem kolo china blong mekem pepa,” hemi talem.
“Chipa no kam yet then oli stat blong katem plante long ol wood we yumi lukim stap daon long Palekula.”
Mr Vira hemi kivim aot infomesen ia long kampani ia blong oli stopem logging mo pem olgeta wood we i hip i stap long Palekula long Southeast Santo.
“Be naoia i kam long wan stage we yumi finemaot bakken se kampani ia eno even pem ol land owna yet so prioriti blong Depatmen ia hemi blong wok wetem kampani wetem ol land owna.
“Yumi mas measurem olsem o yumi finemaot hamas kilometa blong log hemi stap daon long Pelakula, then yumi save calculatem value blong olgeta tu blong oli pem aot ol log ia kolo lan owna.”
VBTC News i traem blong kasem kampani blong karem wan komen be ino gat wan i redi blong toktok.
By Steeve Ayong
