Suprim Kot i kivim oda lo Vanuatu Copra and Cocoa Exporters blong faen VT52 milien i ko long tufala viktim we wan loda i kivim kil long olgeta long Santo lo 2022.
Judge Oliver Saksak hemi talem se insiden ia hemi hapen from “negligence” blong draeva.
Aksiden ia hemi hapen long manis blong Febuari 2022 we i lukim draeva mo owna blong loda ia hemi lusum control taem istap draev ko antap long hill blong kasem hospital mo bangem wan mama mo gel blem we oli bin wokabaot long saed blong rod.
Tufala viktim ya olgeta blong Solomon aelan, Enid Tutuo Agwalasi mo gel blong hem Zariella Agwalasi, i karem fulap kill long olgeta.
Mama ia hemi kam wok olsem wan Nurse long Noten Distrik Hospital long Santo taem aksiden i hapen.
Tufala woman i bin stap wokbaot tugeta long Hospitol lo rod i ko long fire stesen long Luganville.
Henry Alexander Ford Hooker, we hemi draeva blong trak i talem se loda blong hem i bin stap muv long gear 2, mo engine i bin off, i kosem hem blong lusum control mo i hitim tufala woman, mo i kosem fulap kil long ol.
Olgeta woman i ko long kot i mekem wan claim blong 100 million Vatu blong olgeta damejes we i happen long olgeta.
Kleim ia iko aikensem kampani blong Vanuatu Copra and Cocoa Exporters mo kot hearing ibin stat long las yia long namba 19 lo manis blong Julae.
Long namba 2 Febuari long yia ya, Jastis Oliver Saksak, i givim judgmen blong hem mo hemi talem se kampani mo defenden i mas pem wan faen blong ova VT52 milien wetem.
Woman ia Enid Tuta bae hemi karem 23 milien, 627 tausen mo 126 vatu mo gel blong hem Zariella bae i karem 23 milien, 121 tausen mo 929 vatu, tugeta bae total amaon bae hemi VT52,597,018 milien.
Kot i talem se ol defenden long kes ia bae i mas pem bak amaon ia long 30 dei stat long namba 2 Febuari finis.
Sapos no gat igat 5% vatu interes long evri yia sins we kes hemi stat.