Vanuatu Chess Federesen (VCF) Sekretari, Jeremy Elison i tekem fes ples long Vanuatu Chess tonamen taem hemi winim 9 maj long las Satedei namba 17.
VCF i glad tumas mo oli talem se bae oli hostem wan moa tonamen nekis manis long Maj.
Tonamen ia i tekem ples long Wan Smol Bag mo i lukim ova 15 pipol we oli soem intres long Chess taem oli kam blong patisipet.
Event ia hemi olsem wan trial blong Vanuatu Chess Federesen (VCF) blong save faenem moa memba blong joen intenasenol tim blong olgeta.
Chess tonamen blong las wiken ia i lukim olgeta 5 bes pleya; long fes ples hemi Jeremy Elison wetem 9 wins, Seken ples hemi Greizer Miklos wetem 8 wins, namba 3 ples hemi Amos John wetem 6.5 wins, namba 4 ples hemi Nampovas Lesli wetem 6 wins mo long namba 5 ples hemi Liu Dwayne wetem 5 wins.
VCF i glad blong lukim fulap man we oli kam blong waj mo patisipet long tonamen mo oli sek tu se fulap pleya oli saen ap blong ple.
Long yia ia nomo, VCF hemi kwalifi blong kam wan memba blong Intenasenol Okanisesen blong Chess mo kat janis blong tek pat long ol Chess gem raon long wol.
