Extensen blong 99 yia tem lis hemi apply long ol urban eria o ol pablik lan eria nomo.
Ministri blong Lans mo Naturol Risos i kamoat bakeken blong kliarem ol tingting we i reis folem mata ya.
Niufala polisi daereksen blong extendem 75 yia tem lis igo long 99 yia, Gavman tru long Ministri blong Lans mo Naturol Risos hemi konsiderem olgeta tingting blong meksua se hemi benefitim raet blong ol man Vanuatu.
Folem loa, ol lis we tem blong olgeta i stap kasem 50 yia, hemi alowem nomo wan extensen blong 25 yia.
Naoia plante lis i gat araon 6 yia nomo stap bifo tem blong olgeta i kam long en.
Minista blong Lans, Hon. Mako Mahe i kamoat long midia blong talem se extensen blong 99 yia tem lis, hemi blong ol pablik lan eria we Gavman i onem, blong atraktem longfala invesmen long kantri.
Hemi talem se niu polisi ya bai hemi help growem ekonomi blong Vanuatu long plante rod.
Hon. Mahe i talem se wetem gud namba blong turis long kaontri naoia, 99 yia tem lis olsem i helpem ol niu developmen we wan lokol tu i save benefit long hem.
Extensen blong 99 yia tem lis ya i pas long kaonsel blong ol minista, mo oli endosem finis.
