Nomata long ol jalens we oli stap fesem, Vanua Tai network hemi stap gohed blong monitarem ol risos blong ol komuniti blong mekem se oli sef i stap.
Komuniti-based monitoring blong ol risos long Vanuatu hemi gohed yet afta long 29 yia we Vanua Tai Netwok hemi stat.
Long namba 14 kasem18 Oktoba 2024 long Santo, 58 ripresentatif blong ol defren komuniti netwok raon long Vanuatu oli kam tugeta long Annual General Meeting o AGM blong olgeta blong tokbaot ol wok mo ol jalens blong olgeta, mo blong faenem rod blong mekem wok blong olgeta i kam moa strong.
Philemon Rongo, wan representative blong Tan Ae Tas Malbangbang netwok blong Pentecost, hemi eksplenem se oli stap wok long komuniti blong mekem ol pipol oli save gud mining blong environment mo wanem nao oli mas luksave mo lukaotem gud, olsem ol totel, nesting beach blong olgeta, mo ol nesting site blong oli layem egg. Hem i talem se oli mas mekem sua se ol komuniti oli save gud mo help blong lukaotem gud ol eria ia mo blong no mas spoelem.
Rongo i talem se long time we TC Lolai hemi bin hitim komuniti blong hem kam kasem naoia oli gohed blong mekem wok nomo nomata we oli no gat gudfala haos. Hem i talem tu se wok blong Vanua Tai hemi no blong totel nomo be blong lukaotem gud olgeta eria blong environmen long ol komuniti.
Rongo hemi gohed blong talem seh hem wetem ol narafala volunteer weh oli stap mekem wok ya blong monitorem environment oli glad taem ol pipol long ol community blong olgeta oli kam blong luk save importance blong work blong olgeta mo blong lukaotmem gud environment.
Funding hemi wanem weh oli nidim from naya oli stap work nomo folem wanem weh oli gat mo plante taem bai oli mas wokbaot nomo blong mekem ol work ya from inogat funding blong transport.
Vanuatu Fisheries Department mo Wan Smol Bag Theatre nao oli bin fasilitatem AGM blong Vanua Tai long yia ia wetem sapot blong Pacific-European Marine Partnership, Gavman blong Australia, mo Gavman blong Sweden.
AGM ia hemi gat 3 bigfala objektif: blong leftemap awareness long level blong komuniti kasem long level blong provinsol, blong leftemap netwok blong miting blong olgeta, mo blong mekem se AGM blong Vanua Tai hemi kam wan nasonal event we hemi mas stap tekem ples long evri yia.
Picture Credit – Steve Ayong
