Ol pipol blong Diversbay long aelan blong Ureparapara long Torres oli nidim wan niu helt seves folem longfala rod blo travel blong kasem Lehalie dispensary long narasaed blong aelan.
Kol i ko long Kavman blong bildim wan niu kwaliti helt senta long komuniti blong Diversbay blong providem seves i ko long ova 300 pipol long Ureparapara aelan.
Diversbay hemi kat wan aid post nomo mo wan vilij aidpost woka be hemi no save wok long ol bigfala sik, olgeta sik man oli mas finem wan bot blong travel kasm Lehalie dispenseri long West saed blong aelan mo sapos solwota hemi raf, bae oli mas wokbaot nomo from i nogat trak long smol aelan ia.
Wan komuniti lokol, James Nin i talem se kes blong ol bigfala sik mo ol bigfala kil long bodi hemi wan bigfala wari blong olgeta, mo sapos nurse long Lehali i nosave handlem kes bae oli mas raetem ripot mo referem sik man kolo Sola Quatves Mini Hospital long Vanua Lava.
“Be sapos solwota hemi raf bae mifala stap wetem hem nomo olsem, bae samtaem bae nogat eni wea else blong ko from weta nogud,” hemi talem.
VBTC hemi karem infomesen se blong travel long bot kasem Sola Hospital emi 3 hawa mo sapos solwota hemi raf bae hemi tekem 4 hawa olsem.
“Mo mifala nogat airport, sapos I kat airport bae mifala save putum hem long plane blong mifala save tekem kwik flight i ko blo hemi save tekem kwik triment, be sapos inogat be sorry nomo bae mifala save stap wetem hem nomo olsem ia.”
Ureparapara hemi kat transpot blem we hemi bot nomo blong krosem solwota kolo Lehalie mo kasem ol nara aelan long Torres grup, aelan ia i nogat trak mo airpot.
Mr Nin hemi talem se, long tufala helt senta long aelan ia, i kat hemia long Diversbay we hemi aid post nomo.
“Be taem i kam long wan taem we solwota hemi raf bae mifala mas tingting plante mifala mas lukoatem gud mifala.”
Hemi kolosap 28 yia nao we oli bin bildim Lehalie dispenseri long Ureparapara aelan mo hemi kat wan bigfala nid blong impruvum helt seves blem.
Wan konsen praemeri tija blong Ureparapara we tij long Merelava, Ian Wilson hemi talem se wan nara bigfala jalenj we ol pipol blong Diversbay oli stap fesem hemi ol kes blong ol bebe oli bon we wan mama hemi mas wokbaot 2 dei blong kasem Lehalie dispenseri.
“Oli wokbaot kam blong kasem klinik mo oli karem pikinini blong olgeta nomo lo rod blong kasem ples blong Lehalie,” hemi talem.
Rod blong aot long Diversbay kasem Lehalie hemi kat plante hil mo fulap blak ston blong krosem.
Wan nara bigfala jalenj tu hemi sapos fuel blong bot hemi finis mo bae oli mas wokbaot nomo, from nomo se sip hemi no pas tumas kam antap long Torres blong kivim fuel mo bae tekem 2 manis olsem blong kasem Ureparapara.
By Mika Albie
