Wan turis i lusum laef blong hem long Tuesdei, folem wan trip i ko long Mystery Aelan.

Turis ia hemi wan pasenja long Pacific Adventure cruise ship blong P&O, we i stap visitim Vanuatu oltaem.

Cruise ship ya i bin aot long haba long Sydney long Fraede las wik, mo hemi kasem Mystery Aelan long namba 26 Septemba.

Wan boat driver long aelan blong Aneitym, Eddy Tanila, i talem se insiden ia hemi hapen samples long haf pas 10 long Tuesdei moning.

“Mifala kat tu briefing everi taem long shore before mifala boardm boat, taem yana mifala askem long olgeta seh wij wan long ufla hemi stap sik? Yu weh u kat wan sick or u allegik long wan samting aleh talem long mifala, beh nokat wan long ol turis ya hemi talem oli se everiwan oli oraet, so mifala i ko,” Mr Tanila i talem.

“Taem mifala ko kasem ale insiden ya hemi hapen ale haf 11 olsem mifala i kam bak ale dokta blong ship hemi askem long gel blong woman weh hemi ded aleh gel blong ded woman ya jes talem seh olfala woman blong hem i stap sik.”

Mr Tanila i talem tu se oli stap lo wof blong jekem ded woman ya kolosap two hour.

Naoia i stap, P&O i stap traem blong respectem privacy blong ol famili we i stap filim nogud, mekem se oli no save disclosem eni infomesem long saed blong ded blong passenger.

Ship i bin muv bakagen blong kasem Noumea long Wednesdei afta bae i return long Sydney bakegen long namba 30 Septemba.

Long wan stetmen, compani blong ship i talem se oli sherem sori blong olgeta i ko long ol famili blong pasenja we i ded.

Emia i mekem namba tu ded blong turist long Mystery Aelan, wetem fes wan long May we i lukim wan man i drown folem wan medicol problem taem hemi bin stap dive.