Tu helt nurse blong Solomon Islands we i kat kontrak wetem Vanuatu Kavman i abscond(ronwe) mo ko wok anda long Pacific Labour Mobility Scheme.
Ministri blong Foreign Affairs mo External Trade blong Solomon Islands i advaesem ol nes ia se oli no sud ronwe long kontrak blong olgeta long Vanuatu.
Ripot i talem se tufala nes ia i wok mo winim mani finis long Australia anda long Pasific Australia Labour Mobility ia nomata we oli stap anda Vanuatu kavman Pei-rol sistem.
Kavman blong Solomon Islands i ripotem tru long wan press rilis se i kat samples 74 nes blong Solomon aelans oli kat kontrak wetem kavman blong Vanuatu tru long ministri blong helt mo blong sevem Vanuatu.
Ministri blong Foreign Affairs mo External Trade blong Solomon Islands i ripotem se tufala nes ia i ronwe long kontrak blong tufala wetem Vanuatu witaot eni notifikeson o notis blong temineson blong kontak mo ol otoriti i risivim infomeson se plande moa i wantem folem semak rod blong abscond ia.
Ripot i steitem se Vanuatu kavman tru long ministri blong helt i respektem raet blong ol nes ia blong wok long ples we i ofarem gud mani, mbe long semtaem oli sud folem ol tem mo kondison blong kontrak we oli saenem ministri blong helt blong Vanuatu.
Kavman blong Solomon Islands tru long Ministri blong Foreign Affairs mo External Trade i serem semak konsen long ol isu ia mo i wantem wok tugeta wetem ministri blong helt blong Vanuatu blong mekem sua se ol kaen praktis olsem wetem ol nurse blong Solomon Islands long Vanuatu i no hapen bakegen.
VBTC Nius i traem blong kasem wan health otoriti blong komen mbe i no posibol.
