Tu mama i lusum laef blong tufala long West Ambrym folem wan lanslide we saeklon i mekem.
I kat wan olfala woman mo wan yang mama we hemi kat bel blong 9 manis, ripot i talem se bebe ya tu hemi ded.
Tropikol Saeklon Lola hemi kosem bigfla landslide long sam vilij insaet long West Ambrym.
Hemia stat long Craig Cove kasem Lalinda, we ikat wan estimate population bong ova 6000 pipol.
VBTC nius hemi toktok wetem Eria Administrator blong Ambrym, Bong Massing, mo hemi konfemem se tu mama oli lusum laef blong tufla folem ol impact blong landslide ia.
Olfala woman we hemi kat aroun 70 yia, hemi lusum laef blong hem long Port Vato vilij taem hemi stap wantem ko karem medikol tritmen long Melumlum dispensary be ikat roadblok folem landslide ya.
Yangfala mama weh hemi kat bel blong 9 manis, hemi kat aroun 27 yia, hemi lusum laef blong hem wetem bebe blong hem long Lolipulo vilij
Hemi fesem semak situation we rod akses hemi blok blong kolo helt centa long Baiap.
Mr Massing hemi talem se tufla mama ya lanslide i kavrem ap aos blong tufla.
Ripot ikam tu se tufala helt senta ia, saeklon ibin damejm bigwan tufala helt senta ia mo fulap medicine mo ol medikol equipment hemi damej tu.
Mr Massing hemi pointem aot tu se alean ya hemi neva ko tru long wan natural disasta olsem mo i lukim every samting hemi damej.
Hemi addem se ol damej ya hemi ko beyond man pawa blong olgeta blong oli save wok tugeta blong fixim
Mo hemi istap askem bigfla help long olgeta dipaten risponsibol mo kavman blong save helpem olgeta pipol long West Ambrym.
Ripot ikam long wan lokol resident, Willie Tassotasso, hemi talem se kolosap 600-700 aos oli damej folem TC Lola.
Mo lanslide i kaverem ap everi kakai long karen, mo i blokem ol road blong trak blong kolo ol helt kea vaciliti.
