Tropikol Saeklone Lola i stap long Vanuatu naoia.
TC Lola, hemi bin kam insaed long teritori blong Vanuatu olsem katekori 1 saeklon.
Hemi tekem 42 aoa blong hemi kasem katekori 5 taem hemi stap long not-east long ol aelan blong Torba provins.
Long 6pm apdeit long Tusdei, VMGD i talem se hemi naoia wan katekori 4 saeklon.
9.40pm: VBTC i stopum websaet apdeit lo ples ia. Yu save folem apdeit long Radio Vanuatu (FM 100) mo VBTC Fesbuk pej.
9.30pm: TC Lola i stap long top raet blong skwea leta I, namba 6(I, 6) insaed long Vanuatu Tropikol Saeklon Traking Map.
Torba, Sanma, Malampa, Penama mo Shefa i stap long Red Alert. Tafea i stap long Yellow Alert.
6.30pm: VMGD i talem se TC Lola i kam wan katekori 4 saeklon. TC Lola i stap long botom raet blong skwea leta I, namba 5 (I, 5) insaed long Vanuatu Tropikol Saeklon Traking Map.
3.40pm: Shefa i stap long Red Alert naoia. Tafea i stap long Blue Alert.
3.10pm: VBTC reporta Joni Bani i stap long Maewo long Penama provins. Hemi talem se long western area blong North Maewo ikat kale fors winds throughout long day kasem long afternoon ia mo solwora hemi very rough mo rain hemi rain wan wan time.
Ol people oli well prepared mo securem ol haos blong olgeta mo some memba blong ol komuniti oli muv blong stap long ol sef haos.
2.53pm: Pipol istap muv iko insaed long olgeta evacuation senta long East Ambae taem TC Lola istap muv iko kolosap long aelan ia. Naoia Red Alert hemi stap long Provins blong Penama.


1:51pm: Araon 50 mama bae oli muv i ko long evacuation senta blong Anglican jej long Sarakata eria long Luganville.
Oli kasem anaonsmen naoia long Operation Maneja blong Sanma, Anaclet Philippe blong maket i klos long 12 lunj taem folem rabis weta blong saeklon we i stap kam.
Ol mama blong Malo, West Coast, Saot West Santo mo Bigbay.

1:48pm: Wan papa long East Vanualava Mr Aton Bollen i talem se, emi fastaem we emi lukim solwota i go ova mak bitim ples we solwota i stap kasem bifo.
Emia folem veri raf solwota we Torba i stap experiensem.

1:39pm: Ol pipol long Pentecost oli stap katem i shot ol stampa blong kava rere long Saeklon Lola.
Foto blong Paolo Malatu.

12.37pm: Foto ia i soem damej blong solwata long Rah aelan long Torba provins.

12.31pm: Letes apdeit long VMGD i talem se TC Lola hemi stap long senta lef blong skwea leta J, Namba 5 (J,5) insaed long Vanuatu Tropikol Saeklon Traking Map.
Hemi stap lo 175km east southeast blo Sola mo 120km northeast blo Maewo. TC Lola i muv i ko lo south southwest direksen lo spid blo 11km/h (6 knots) lo las 3 aoas we i pas.
12.30pm: Sam business long Port Vila i stap putum ap shuta. Shefa provins i stap long yellow alert. Hemi i minim se oli expectem kale fors winds long nekis 36 hours.

12.22pm: VBTC reporta long Ambae, Gibson Tari, i talem se ol pipol lo east Ambae oli sta muv igo lo evacuation senta.
12.20pm: Malekula i gat strong wind. Malampa provins i stap long red alert long tete moning.

11.30am: I nogat propa evakuesen senta we i stap long aelan blong Tongoa.
Eria Administrator blong Tongoa Eria Kaonsel, Wilson Timataso, i talem.
Hemi se wetem olgeta haus we i stanap afta long TC Judy mo Kevin long March yia, oli no strong inaf blong pipol i haet long hem long taem blong TC Lola naoia.
Pipol i mas muv igo long ol skul mo olgeta strong haus we i stap klosap.
“Ol committee blong yumi oli stap lukluk long ol rispons plan blong olgeta, oli stap lukluk long ol haos weh hemi strong,” hemi talem.
“Hemi ol haos blong yumi we ol pipol oli save safe sapos saeklon hemi kam strong. Yumi nokat plante evakuasen senta long Tongoa.
“Yumi dipen nao long ol skuls blong yumi we oli strong mo samfala haos blong ol familis weh pipol i save haed lem. Emia smol update we mi save kivim long Tongoa.”
Wetem hemia, bae ol pipol i stap kwait long haus mo lisin long olgeta letes updeit we Vanuatu Meteorology bambae i rilisim about letes statues blong TC Lola.
10.45am: Air Vanuatu hemi kanselem ol flaet blong hem iko long north blong kauntri includim Santo.
Hemi kansel mo reschedule ol international flaet blong hem tu stat long Monday ia.
Hemia i folem Tropikol Saeklon Lola.
Long wan statment, Air Vanuatu i talem se reason hemi from Air Vanuatu ino wantem putum laef blong ol pasenja mo staff long denja.
Olgeta domestik flaet we i kansel hemi blong olgeta airpot long Tusdei namba 24 hemi Paama, Ambrym, Malakula mo Santo.
Long ol international flaet blong hem, hemi kanselem olgeta mo re-schedule olgeta flaet blong Auckland, Nadi, Brisbane, Sydney mo Melbourne.
10.13am: VBTC reporta long Ambae, Gibson Tari, i bin talem se east blo aelan blo Ambae mo fulap ples lo Penama provins i stap facem ol strong win mo heavy rain since lo night kasem tete morning.


10am: Anglican jej long Sarakata eria long Santo i stap olsem wan evacuation senta blong pipol i save ko haed long hem long taem blong saeklon.
Toktok i stap tekem ples naoia long Sanma Provincial Emergency Operesen Center naoia long Luganville blong save ol wok we wan cluster olsem Polis o media i save mekem long taem rabis weta ia.
National Disasta Management Ofisa long Sanma, Philip Meto i stap talem wanem blong mekem.
9.55am: Wan papa long Motalava i talem lo VBTC Nuis tete long morning se luk olsem solwota i bin ko antap kasem 2 meter long hae taet blong solwota last naet.
Emi talem tu se pipol oli sef nomo.

9.30am: Naoia Torba, Sanma, Penama mo Malampa oli stap long Red Alet finis.
Shefa hemi stap long Yellow Alet.
9.22am: Tropikol Saeklon Lola i stap long katekori 5 naoia.
9am: Shefa Edukasen Ofis i talem lo ol skul long Shefa provins se oli mas mekem gudfala preparasen blong TC Lola.
Provincial Edukasen Ofisa long Shefa, David Naviti, i putumaot wan leta i go lo ol skul lo Shefa provins. Hemi talem se ol skul i mas mekem sua oli gat naf clean wata, oli mas putum ol equipment mo teks buk long wan sef ples, mo oli mas tekem daon ol tents.
8am: Hemi namba 9 tropikol saeklon woning, we Vanuatu Meteorology i putumaot araon 6 oklok tete moning.
TC Lola emi go antap long katekori 4, long 11 oklok lokol taem long yestedei, Mandei naet.
TC Lola emi stap long bottom left kona blong skwea, leta J, namba 4, blong Tropikol Saeklon Tracking Map blong Vanuatu.
Hemi stap lo 190 KM east blo Sola mo 185 KM northeast blo Maewo. Hemi muv i ko lo south southwest direksen lo spid blo 11 KM/HR (6 knots) lo las 3 aoas we i pas.
Ol distraktif stom fos wins blong 130km/h (70KTS) insaed long 90 notikol maels long senta blong Saeklon mo i save afektem ol aelans blong Torba, Penama mo Sanma provins long dei blong tete.