Vanuatu Meteorology mo Geo-Hazards Dipatmen (VMGD) i talem se i gat wan tropikol low sistem long Western pat blong Vanuatu we i stap kosem ren mo strong win long ol aelan. I gat jans tu blong sistem ya i save kam wan saeklon.

Saeklon fokasta blong VMGD, Jerry Timothy, i talem se low presa ya i stap long west blong Tafea Province mo i stap kosem ren mo win long ol ples olsem SHEFA mo Tafea.

Hemi eksplenem tu se ol kondisen blong wea i stap mekem sistem ya i save develop yet, be wind shear i stap holem sistem ya back.

“Blong talem se bai sistem ya hemi develop i kam wan tropical cyclone, yumi mas lukluk ol kondisen. Temperature mo win speed i stap gud, be wind shear hemi stap holem sistem ya back,” Timothy i talem.

Long nekis 12 haoa, jans blong sistem ya i kam saeklon i stap long moderate level. Ol noten aelan blong Torba, Penama, mo Malampa i luk jenj long weta long ol past deis folem sistem ia.

Nomata sistem ya i no saeklon yet, VMGD i putum aot ol woning finis blong hevi renfol, flash flooding, mo strong win long solwota.

Timothy i talem se, “Woning blong inland wind more than 20 knots hemi stap, warning blong more than 25 knots long open solwota hemi stap, mo warning blong heavy rainfall hemi stap. Yumi mas redi from sistem ya i save develop folem ol dei we i stap kam.”

Hemi gohed se sistem ia bambai hemi muv long wan Saot-Is direksen bitwin Tafea Provins mo New Caledonia.

Pipol i mas redi mo stap long alert folem ol apdet we bai VMGD i givim long ol nekis dei.