Tropikol Lo we i mekem plante ren long Vanuatu long pas few dei, i stap long saoten pat blong New Caledonia, be i stil afektem weta long sentrol mo saoten pat blong Vanuatu.

Ol southern aelan oli save expectem ren yet long wiken ya.

Prinsipol Saentifik Ofisa blong Marine long Vanuatu Meteorology mo Geo-Hazards Dipatmen (VMGD), Ellen Luke, i talem se Tropikol Lo ya bai i muv long wan southeast daereksen.

Hemi talem se system ya i stap kivim cloudy condition long south mo central mo i gat janis blong samfala hevi renfol i save hapen yet. Ol aelan long south oli save kasem strong inland wind tu, we i stap long 37 kasem 55 kilometre long wan haoa.

Weta dipatmen i talem se woning blong strong win long solwota i stap yet long olgeta aelan wetem northwest win bai i stap long 21 kasem 25 knots, mo solwota bai i save ko antap kasem 2.5 meter long central mo north, mo long southern waters, wind i save kasem 21 kasem 30 knots mo solwota i save go kasem 3.5 meter.

Ms. Luke i talem se woning blong hevi renfol mo strong inland wind long not mo sentrol aelan bai i klia long wiken, be saoten aelan bai oli stil expectem ren.

Hemi talem tu se i gat wan area blong wind o trough ova long New Caledonia we i save fomem wan o tu low pressure nekis wik.

Be janis blong hemi develop i kam wan tropikol saeklon, hemi low long nekis faef dei.

Meteo Dipatmen i advaesem pipol blong stap pripea oltaem mo bae oli gohed blong monitorem sistem ya mo givim update sipos i gat jenis long weta.