Tropical low we i bin kosem strong win mo ren long Saot-Wes blong Tafea Provins i stat muv i go long Niu Caledonia.
Jerry Timothy olsem Saeklon Fokasta long Vanuatu Meteorology mo Geo-Hazards Dipatmen (VMGD) i talem se sistem ya hemi gohed blong muv aot long wan Saot-Is daereksen long pas fiu haoa.
“Sapos tropical low ia i gohed long saot-is daereksen, bai hemi stap longwe moa long yumi long tumoro naet mo i muv aot long kantri.”
Be wan narafala low presa i fom aotsaed long Wes blong Vanuatu mo i stap travel long wan Saot-Is daereksen tu.
Wetem hemia, pipol i save expectem rabis weta blong hevi ren mo strong win bambai i gohed blong stap long wik ya.
“Hevi ren mo klaod aktivit blong hem bambai hemi muv in ova long kantri long Wednisde naet mo igo kasem Tasde bai yumi save expectem inkris intensity blong win ova long ol aelan blong Vanuatu,” Timothy i talem.
While VMGD i no putumaot wan saeklon woning yet, woning blong rabis weta hemi aktiv truaot long olgeta aelan naoia.
Timothy i talem se Vanuatu i stap long saeklon sisen blong hem yet, we inkris long tempreja i save kosem moa low presa.
“Yumi stap yet long saeklon sisen, mo yumi saveh expectem ol low pressure blong develop kwik. Pipol i mas redi mo mekem sua se oli folem ol apdeit blong meteo.”
VMGD i gohed blong monitorem sistem ya mo bambae oli talem sapos i gat moa risk.