Tri wik curfew i aplae nomo long Shefa mo Sanma long 8pm-6am.
Director General blong Health, Russel Tamata i konfemem.
Long tete Minista blong Health, Bruno Leingkone i anaonsem long National TV se Torba, Penama, Malampa mo Tafea i kobak long alert level 1.
Minista Leingkone i talem se Non-Essential mo Essential seves i ko hed nomol except ol naet club.
“Ol skul, bank, Kavman Ofis mo nara seves i opereit nomol be pipol i mas folem ol rul blong alert level 1,” Minista Leingkone i talem.
Minista Leingkone i talem se ol fo provins ia oli save travel bitwin olgeta.
“Ol proses mo muvmen blong cargo bambae yumi yusum ol strik rul blong cargo we i stap,” Minista Leingkone i talem.
“Yumi alaoem ol pipol blong travel i kam long Port Vila olsem we i stap long health travel plan. Yumi we yumi wantem travel i ko long ol aelan blong fo provins ia bae yumi alao nomo long spesel kes afta long apruvol blong Public Health Director.
“Travel bitwin Santo mo Efate i ko hed nomol be pipol i mas folem ol proses blong Public Utilities Ministry.”
Shefa mo Sanma i stil stap long alert level 3 we i minim se i kat hae risk long komuniti from i kat plante COVID kes.
Minista Leingkone i talem se social gathering olsem ded, mared, sport tunamen mo naet club i no alao long Sanma mo Shefa.
“Ol nara seves we oli wantem opereit oli mas produsum ol COVID plan mo kasem i mas kasem health apruvol,” Minista Leingkone i talem.
“Hemi no isi be pipol i mas kat rispek.”
