Tri pikinini i ded long faea insaed long wan haos long Teouma, Efate long wiken.

Issac Nebal, Ankel blong ol pikinini ia, i talem se oli stap silip insaed taem candle i bonem haos ia mbe oli nosave se hao hemi stat.

Mr Nebal i talem se oli sori bigwan.

“Dadi wetem mami tufala i laetem candle i stap, tufala i aot long haos mo i bonem haos,”Mr Nebal i talem.

“Insiden ia i hapen long 5pm long Sunday aftanun, mifala i bin ko washem haos ia long wota mo afta i stop.

“Mbe mifala i nosave ko insaed long haos from tumas smoke. Mifala i wet smoke i ko daon taem mifala i ko mbe ol pikinini ia i ded vinis.

Trifala pikinini ia i kat tu boy mo wan gel. Tufala ia boy ia hemi twin blong fo yia mo sista blong tufala we i gat faev yia.

Mary Andrew, Anti blong olgeta pikinini ia, i resem konsen blong hem folem candel we hemi causem plante aos i bon.

“Mi olsem anti blong olgeta pikinini we i lus, mi wantaem talem nomo long ol bigman blong yumi se taem oli ko long Palemen oli mas faenem ol wei blong stopem sale blong candle from plante haos i stap bon,” Mrs Andrew i talem.

“Plante pikinini i stap ded mo mifala i sori tumas long trifala pikinini blong mifala ia.”

VBTC Nius i kasem toksave se bodi blong trifala pikinini ia i stap long Vila Central Hospital mo ol viktim ia oli blong Tanna.

Fire Seves Dipatmen long Port Vila i talem se oli no bin kasem eni kol abaot faea insiden ia.