Tri man i stap long serious kondisen long Vila Central Hospital folem ol bigfala kil we oli kasem long wan faet long Twi Field, West Malo i no longtaem.

Polis Media senta i talem se polis i stap mekem investikesen. Ripot we oli kasem se tri man ia i bin faet wetem wan man mo boy blong hem taem boy i katem olgeta wetem knife.

Commander CID long North we i beis long Luganville, Afremen Kender i talem long VBTC Nius se sam klos witnes oli se oli faet from graon mo sam oli se from faol.

Mr Kender i talem se oli no karem enaf infomesen yet from ol viktim blong faet we oli stap tu olsem ol saspek oli stap long hospital from tritmen.

Hemi talem se i gat fulap stori from faet ia we oli nidim moa investikesen blong konfemem.

Polis i ripotem se ol tri brata ia oli bin tekem bush knife mo lastik mo ko long haos blong wan narafala famili mo threatenem mo swear nogud long papa blong famili ia .

Taem oli stap threatenem papa ia, boy blong hem i kamaot wetem wan bush knife mo faet i stat.

Polis i talem se wan long ol tri brata ia i katem sorae blong papa ia wetem knife mo boy blong hem i defendem papa blong hem mo katem narafala man ia wetem knife.

Polis i stap askem blong tufala famili i stap kwaet mo letem loa hemi dil wetem kes ia.

Olgeta man ia i stap long Intensive Care Unit naoia.