Tri flaet bae i kasem Vanuatu taem International boda i open long tumoro(July 1).
Chief Executive Ofisa blong Vanuatu Tourism Ofis, Adela Aru i konfemem wetem VBTC Nius long tete.
Fes flaet blong Air Vanuatu long Noumea-Vila long 10am wetem araon 60 pasenja. Seken flaet long 3;30pm hemi long Sydney-Vila wetem araon 162 pasenja. Mo araon 11pm, nambatri flaet long Brisbane-Vila wetem ova 160 pasenja.
“Satete moning bae yumi kat wan riten flaet blong Auckland-Vila. Mo hemia yumi kat ova 150 pasenja we oli konfem blong kam long flaet ia,” Mrs Aru i talemaot.
Vanuatu Tourism Ofis i estimatem se 1/3 hemi olgeta turis long fo flaet ia.
“So yumi welkamem bak ol riten residen, ol ripit visita mo ol niu visita we oli kam long Vanuatu,” Mrs Aru i talem.
“Mifala i wok wetem ol Tourism Industry Opereta long Port Vila mo Efate mo notem se i kat konfemesen long ol hotel, resort, mo ol nara akomodesen operata we oli rere. Olgeta ia oli bin atendem sef bisnis operesen mo oli kat wan klin caring checked certificate we Dipatmen blong Tourism i provaedem. Mo sins we oli stap karem bak konfemesen blong booking mifala i glad tumas we olgeta tu i luk fowod blong welkamem ol guest long July 1 mo ol manis i ko.”
Mrs Aru i talem se July ia bae oli fokas nomo long Efate mo Santo olsem ol tourism redi destination.
Hemi talem nara tu manis bae oli wok blong mekem awenes mo prodak asesmen long ol nara aelan blong ol pripea from olgeta i bin klos folem COVID mo June nao Minista blong Health i anaonsem se ol ristriksen ia i aot.
Kavman i anaonsem International Boda opening long April 8 long yia ia mo Mrs Aru i talem se oli bin wok wetem Health Ministry blong wan Rod map.
Long las faev manis anda Vanuatu Tourism Ofis, Vanuatu Skills Partnership mo Australia Pacific Training Coalition i bin aksesem long Port Vila 109 accomodation bisnis mo diliverem sef bisnis training, mo Mrs Aru i konfemem se 42% oli redi.
Olgeta Restaurant, kolosap 20 i ases mo 33% i redi blong save opereit. Long Tour/activity ova 40% i redi.
Long Luganville, Santo 65% accomodation bisnis oli ases mo 38% i redi blong July Ist. Restaurant oli 100% redi. Long Tour/activity ova 37% i redi.
Vanuatu i kasem hae namba blong ol visita long 2019 we hemi 120,628.
“Yumi faenem se totol arivol blong ol visita mo namba blong ol naet mo booking long olgeta hotel, resort mo accomodation operata oli talem se oli karem in bitwin 70 -80 blong occupancy olsem wan average so hemi soem se hemi hae,” Mrs Aru i talem.
“Long saed blong airline nomo, Airports Vanuatu i konfemem se oli risivim hae namba blong ol pasenja we oli pas tru long tri airport blong Port Vila, Santo mo Tanna. So hemi soem se 2019 hemi wan rili gud yia. January mo February 2020 mifala i faenem se growth ia i kontinu blong hapen kasem long March we COVID outbreak.”
Hemi afta tu yia we International boda blong Vanuatu i klos from COVID.
