Sam lokol i filim se toktok ya ‘Sapotem Lokol Tourism’ hemi wan samting blong meintenem Tourism indastri long taem blong pandemic mbe naoia we Boda i open plante ples i no akseptem ol lokol.
Long taem blong lok daon blong kaontri from fraet blong COVID, ol lokol oli bin sapotem big wan turism bisnis raon long kaontri.
Naoia we boda i open bageken, VBTC Nius i karem sam komplen long pabik se ol resort oli no stap mekem samting i fea long olgeta.
Wan lokol i talem se “Mi no glad taem mi wetem famli blong mi wantem ko swim long Eden River, taem we mifala i ko, mifala ko long entrens askem long woman we i stanap long entrens se amas long fi , woman ia i talem se sori long ol lokol oli nomo alao long taem blong cruise ship, mo disisen ia hemi kam long boss blong olgeta.
Kwesten blong mi i ko long ol resort se taem blong lokdaon blong kaontri long COVID ia mifala ol lokol yana mifala i helpem yufala bigwan mo tu kwesten i ko long tourism sekta we bigfala toktok ia ‘sapotem lokol turism’, hem ia emi minim wanem stret?.”
Wan nara man long pablik i talem se bifo long COVID ia oli stap karem ol pikinini i ko long Breakas resort, so mi wetem smol boy blong mi mitufala i ko, plesem kakai blong oda mbe maneja blong olgeta oli kam i talem se sori naoia ol lokol pikinini oli nomo alao blong kam insaed ia mo bae mitufla mas ko wet aotsaed. Mi harem nogud mo mi aot ko aotsaed.
Toktok we mi wantem i kasem ol otoriti konsen hemi mifala ol lokol ia na mifala i help blong sastenem olgeta long taem blong lokdaon, naioa we boda i open bageken oli stop blong sta difrentiatem ol lokol, mo ting daon long ol lokol oli mas mekem samting i fea.”
Tourism i talem se hemi kat wan code of kondrak we i stap mo i expektem blong evri turism bisnis oli mas folem.
Principal Accrediation Ofisa blong Tourism Dipatmen, Geraldine Tavoa i talem se i kat wan code blong kontrak i stap we evri bisnis turis opereta oli saenem bifo oli ranem wan bisnis mo insaet long code of kondak ia i kat wa agrimen i stap we ol turism opereta oli mas tritim fea lokol komuniti, staff mo ol international visita.
Paul Pio, Marketing Ofisa blong Vanuatu Tourism Ofis i talem se pipol i save ripotem ol kaen fasin olsem mo oli save tekem ap i ko long long turis opereita.
Tourism i talem se ol turis opereta oli mas stop blong mekem diskriminesen akensem ol lokol.
By Patience Mawa.
