Polis long Torba i arestem saspek we hemi ronwe sins 2021 long eli wik ia hemia long Gaua.
Harry Sandy, wan lokol blong Qeteon, Saot East Gaua long Banks Islands, Polis i bin arestem hem long Monday ia long haf pas tri long moning folem rong blong mekem trabol wetem wan pikinini anda long 14 yia long June 2021.
Torba Polis i bin arestem Mr Sandy long Gaua long 2021 blong ko long Santo folem isu warrant arest blong Jastis Viran Trief mbe hemi bin ronwe long naet long June 2021.
Torba Polis i talem se oli aot long Sola, Vanualava long Sunday mo Monday long haf pas tri long moning oli kasem hem folem infomesen we oli kasem long ol lokol se hemi stap long haos blong hem.
Naoia Mr Sandy i stap long Sola mo wet blong ko long Santo taem weta i gud blong harem sentens blong hem long 22 February.
Torba Polis i talem se ol pipol long Gaua i glad from Mr Sandy i stap olsem wan denja long komuniti mo oli bin stap fraet bigwan.
Kaonsela blong Gaua mo semak taem wan lokol long komuniti blong Qeteon, Tari Hosea, i bin mekem wan strong kol blong ol lokol i helpem polis blong faenem Mr Sandy.
“Hemi wan risk long komuniti we naoia Mr Sandy i stap haed yet mo no wantem sarenda long Polis,” Mr Hosea i bin talem long VBTC Nius.
Torba Polis i talem se Mr Sandy i stap wetem nara faev saspek we oli mekem ol nara rong fasen blong ko long Santo.
Mr Hosea i talem se ating hemia i festaem we wan lokol we i mekem rong i ronwe long hand blong polis mo hemi no wan gudfala exampol.
