Vanuatu Football Federation (VFF) hemi talem se tournament blong World Cup Qualifier we bae hemi tekem ples long New Zealand hemi wan important tournament from Brian Kaltak olsem wan top player bae hemi lidim wan squad blong 23 man blong tim Vanuatu long tournament ya. 

Nasonal hed kotj blong tim Vanuatu, Juliano Schmeling, hemi anaonsem long week ya 23 player long tim Vanuatu blong tekem pat long Oceania World Cup Qualifier long New Zealand. 

Long wan pres konferens we VFF hemi organisem long week ya, hed Kotj Schmeling hemi talem se seleksen ia i no bin isi, mo evri pleya oli bin wok strong blong mekem se oli ko long nekis step blong kompetisen. “Bambae mifala i ko long New Zealand mo bae mifala mas mekem gud long ol fes kem blong mifala. Fes kem blong mifala bambae mifala play wetem tim New Zealand, mo play wetem tim Tahiti long namba tu kem. Wetem wan win long tufala kem ia, mifala i save ko tru long semi-finol. Mifala i save se bambae hemi no isi, be mifala i rere blong tekem janlens ia.”

Harry Atisson, olsem hed blong delegesen blong tim Vanuatu long tournament ya, hemi talem se hemi gat bigfala expectation long tim Vanuatu.

Atisson hemi talem se, “olsem hed blong delegation, mi wantem talem long pablik se evri tournament blong Oceania Football Federation oli impoten, be World Cup Qualifier hemi wan special samting. Evri man long wol i stap luk hu nao bambae i win mo kwalifae blong ko long United States of America o Canada.”

Atisson hemi talem tu se ol seasonal woka blong Vanuatu long New Zealand, espeseli long Hamilton, Auckland, oli bin pem ol tikit finis blong sapotem tim. “Oli pem tikit finis blong wajem kem. Oli askem blong sapos tim hemi save go daon wetem plante flag blong Vanuatu. Mi askem Minister blong Internal Affairs, Minister Andrew Napuat, mo Director General blong ministry ya blong kivim 1000 flag blong tim hemi go wetem. Sapos yu stap long New Zealand, plis kam sapotem ol bois long tournament ia.”

Atisson mo Schmeling oli talem tank yu long olgeta famili blong ol pleya, ol klap we oli plei long hem long Vanuatu mo ovasi, mo ol fans blong futbol from sapot blong olgeta tru long ol priperesen blong tim ia.

Rod blong FIFA World Cup 26™ Oceania Qualifier hemi stat long New Zealand, mo tim blong Vanuatu hemi hop blong mekem impact blong olgeta long kompetisen ia.

Image courtesy of Facebook: Vanuatu Football Federation