Teaching Service Commission i tok akensem notis blong straek we Vanuatu Teachers Union i putumaot.

Secretary General blong Teaching Service Commission, Dick Hopkins, i kwestenem pawa blong National Executiv Komiti.

Long eli wik ia tijas union i putumaot wan notis blong straek folem 14 kleim we oli talem se kavman i no mitim o adresem.

Mr Hopkins i talem se straek hemi no profesonal mo commission i nosave wanem oli stap tokbaot.

“Mifala i redi blong jalenjem from wan acting presiden we hemi employ tru long commission, hemi wan tija, mo hem nao i stap odarem Ministry blong Education mo commission blong ko sitaon mo toktok long ol eria ia,” Mr Hopkins i talem.

“Mo long sapraes blong mi oli mekem national tresaurer blong Vanuatu Qualification Authority i saenem, hemia i stap minim wanem? Mama loa i gviim hem raet? So poin blong commission hemi putum long kwesten validiti blong sabmisen. Mo long save blong mifala secretary general nao bae hemi saenem sabmisen ia.”

Ministry blong Education mo Training i stap sikim legal advaes long notis ia from ol tija we oli bihaen long tingting blong straek ia oli pem olgeta blong stap long klasrum.

“Teaching Service Commission i karem apruvul blong Director General blong Ministry blong Education mo Training blong stap mekem wan kol i ko long eni tija abaot eni nius we i stap kamaot long pablik abaot wan straek, long level blong commission bae hemi no toloretem,” Mr Hopskins i talem.

“Eni tija we i stap ko long straek behaed long lidasip blong commission we i putum kwesten long integreti mo hao hemi adresem proses ia anda long loa mo trade union act, long mifala hemi no wan jok.”

Mr Hopskins i askem pipol we oli ranem tijas union blong aknolejem komitmen blong kavman long grievenses blong ol tija.

“Yumi wantem rili kasem wanem i rili behaed long straek ia from kavman i traem best blong hem,”Mr Hopskins.

“Nara samting abaot ol 14 pon ia, yumi stap long review blong Teaching Service Staff manuel, mo insaed long hem yumi bin kat ol provinsiol konsaltesen blong givim janis long ol tija blong givim poin blong olgeta.

Mr Hopskins i talem se hemi stap long evri miting mo hemi fuli awea long ol isu blong ol aotstanding kleim.